Omubiisofi Ngodji a pakwa
OMUBIISOFI waElcin opo a hololwa Dr Martin Ngodji okwa fudikwa Olomakaya komaendo mOkongo momukunda wavo, moshitukulwa shaHangwena.
Ovalilifya va dja keenhele da yooloka moshilongo, ovafitaongalo vaELCIN, ovawilikingeleki yaELCIN, ovakwanehongalo va yooloka ova hokolola Ngodji onga a li omunambili woshili, omulumenhu ou kwa li e hole okuyakula ovanhu nenyanyu.
Okwa xulifa mepupi leedula 61 moshipangelo shopaumwene shaNdangwa momafiku 17 Sepetemba neudo, konima eshi a monika ombuto yoCovid-19.
Ngodji okwa hangika ashike opo kwa li a hoololwa neudo 17 Aguste opo a ninge omubiisofi wongeleki yaELCIN koshikandjo shokoushilo.
Opa pita ashike omwedi konima eshi Ngodji a hoololwa onga omubiisofi mupe ndele ta xulifa.
Metumwalakaladjakombelewayoshilongolaleshwa kungoloneya woshitukulwa shaHangwena Walde Ndevashiya, Ngodji okwa tangwa onga omulumenhu e na elandulafano, omukondjelimanguluko woshili.
Ndevashiya okwa ti ongeleki yaELCIN oya kanifa ependafule la li hali longo oilonga yalo pefimbo, nokukala tali yakula ovanhu aveshe nombili.
Okwa ti Ngodji okwa kala omudeuli wovafita a li ha longo nelitulemo nokukwashipaleka kutya ovafita ova pewa ounongo wa wana, yee okwa li omushangimbiibeli woshili kehangano lombiibeli moNamibia.
Hamushanga wongeleki yaELCIN Alpo Enkono okwa hokolola Ngodji onga omulumenhu a li e hole okupukululafano koilonga, e na elongelokumwe, okwa ti Ngodji okwa li ha longo oilonga yaye noudiinini efimbo keshe unene tuu ngeenge ta shange obimbeli.
Enkono okwa ti Ngodji okwa fiya po omwaka wakula mongeleki yaELCIN.
Ounona waNgodji ova hokolola xe tava ti okwa li omulumenhu e hole ovanhu aveshe meumbo, a tekulila ounona vaye oukriste, nokufimaneka ovanhu.
Ova ti kutya xe kakwa li e na okatongo shaashi okwa kala ha yandje outeku kovanhu aveshe ufike pamwe.
Omukulukadi waye Saima Ngodji naye okwa hokolola ta ti Ngodji okwa li omulumenhu e na ombili efimbo keshe, omutekuli wovanhu shaashi vati meumbo lavo ova tekula mo ounona vahapu ngaashi ounona vovayelele.
Okwa ti omulumenhu waye okwa li a fimaneka ehongo, vati alushe oha kala ashike ta tu ounona omukumo opo va kale tave litula mo moilonga yavo yofikola.
Ehangano lombiibeli moNamibia ola hokolola Ngodji onga a li omutoloki wombiibeli, omulumenhu kwa li e hole okushanga oishangomwa ya yela nawa.
Ngodji okwa li e na okukala a nangekwa pambelewa momafiku 14 Novemba neudo, ashike ina fika vali omolwombuto yoCovid-19 ye mu dipaa.
Ngodji okwa dalelwe 15 October 1960, momukunda Okamanya mOkongo moshitukulwa shaHangwena.
Okwa tameka oshilonga shaye shoufita momudo 1986, omo kwa li a kala ha kula ovanhu nombili.
Okwa yakula koikondo ya yooloka mongeleki yaELCIN, omo kwa li e li omufitaongalo kehongalo Omundaungilo momudo 1986 fiyo 1996.
Momudo 1988 fiyo 2003 okwa li hamushanga wongeleki yaELCIN koshikandjo shokoushilo loikando ivali.
Ngodji okwa yakula yoo vali kofikola youfita koPaulinum oko a kala ta longo onga omudeuli wovafita oule weedula heyali, nokonima Ngodji okwa ka ninga omukulunhuwiliki wofikola yovafita moPauliunum.
Okwa li yoo vali ta yakula kehangano lokushanga ombiibeli melaka lOshikwanyama nOshindonga, omo kwa li a longo onga omutoloki nomushangi wombiibeli moNamibia.
Okwa mona eenghatu dihapu dopaulongelwe meni nokondje yoshilongo.
Ngodji okwa fiya po omukulukadi waye, nounona vaye vanhe, ovakadona vavali novamati vavali.
– fhamalwa@nepc.com.na