Omulumenhu a tuwa nombele fiyo omefyo
Omulumenhu weedula 35 okwa fya eshi a tuwa nombele loikando 10 kunyamukwao, omanga ohonda yaye oya mona oshiponga eshi nayo ya tuwa nombele efimbo lokeengula potundi 04:00 Olomakaya, kolukanda DRC moSwakopmnund.
Nakufya oye Kamati Sylvanus Kamati, omanga ohonda yaye ei nayo ya mona oshiponga eshi ya tuwa nombele oyo McLean Gawanas.
Omupopiliko wopolifi moshitukulwa Erongo Inspector Ileni Shapumba okwa hokolola ta ti nakufya okwa li a nangala nohonda yaye Gawanas, kobashu yomukainhu waye.
Shapumba okwa ti efimbo lokeengula Gawanas okwa uda omunhu ta konghola pobashu yaye ashike ina patulula po nande shaashi vati okwa kala ta ti pamwe eembudi. Omufekelwa eshi kwa li ta konghola pobashu, eshi a mona kutya ita patululwa okwa teya po omuvelo wobashu fiyo ta i meni. Opolifi oya ti omufekelwa okwa li ve li mekwatafano lopahole naGawanas tete, ashike ohole yavo nomufekelwa oya teka po konima yeemwedi mbali.
Konima eshi ohole yavo ya teka po Gawanas okwa ka mona po omulumenhu mupe, ou nee va hangika va nangala naye kohonda yaye ikulu ei i li omufekelwa paife. Shapumba okwa ti konima eshi omufekelwa a ya meni lobashu okwa tameka okudenga Gawanas, nokonima okwa tameka okumutwa nombele loikando ihapu. Okwa ti nakufya okwa ya pokati kavo, ta lombwele omufekelwa kutya eshi ta ningi osha puka.
Konima omufekelwa okwa tameka nokuli okutwa Kamati nombele loikando 10 fiyo omefyo.
Kamati opo a xulifila pobashu yohonda yaye, omanga Gawanas okwa twalwa koshipangelo shaSwakopmund opo a ka mone epango lopaunamiti shaashi okwa mona oshiponga unene a ninga eembululu molutu.
Konima eshi omufekelwa a dipaa nyamukwao nokutwa ohonda yaye ikulu okwa faduka po.
Omufekelwa omulumenhu weedula 26,womolukandaDRCmoSwakopmund.
Shapumba okwa ti omufekelwa okwa kwatwa po kopolifi nota ka holoka momhangu yaSwakopmund Omaandaxa. Olutu laKamati ola twalwa kokila yoshipangelo shaSwakop, novakwapata vaye ova shiivifilwa efyo laye. Opolifi oya ti omakonakono otaa twikile.