‘Ondjokana hayo oshituthihango’
ONDJOKANA omuzalo gwonkalamwenyo, ihe oyendji ohaya ilongekidhile noku simaneka oshituthingo, pe hala lyoku ilongekidhila ondjokana.
Omupopiliko nomugandji gwomauyelele gwoongeleka dhaElcin Thomas Uushona okwa popi kutya okwa ndhindhilike kutya oshigwana osha pumbwa okudhinda nokudhimbulula kutya oshituthihango hasho ondjokana.
“Oyendji oya ndopa noya manenwa po ethimbo oshoka anuwa otaya longekidha oshituthihango, ihe itaya longekidha onkalamwenyo yomondjokona,” ta popi ngaaka.
Ta ti, okwa ndhidhilike kutya omaupyakadhi ogendji ohaga holoka mbala konima yohango, oshoka shoka ya kala nokwiilongekidha, ka shi shi oompumbwe dhonkalamwenyo mondjokana.
“Oto adha yamwe taya hiila otenda yongushu N$70 000 yesiku limwe ashike. Oshike oshimaliwa shoka itashi longithwa po okutunga ehala lyokuningilwa iituthi megumbo, naaluhe megumbo moka mu na oshituthi, otaya longitha ehala ndyoka,” ta gandja edhilaadhilo.
Okuya mondjokana mongaashingeyi, okwatalika ko kutya owu na okukala wu na oshimaliwa.
Uushona ta ti, ohango ohayi vulu okuningwa kutya ka pena iikulya shoka sha simana okuyambekelwa ondjokana oshowo omazimo ga laleke oyana.
“Aantu ohaya mana po ethimbo okulongekidha oshituthi, okulya nokunwa oshowo okufuula oshigwana kutya oshituthi osha li sha dhenga mbanda, ihe ayihe mbyoka kayi na sho tayi ti, monkalamwenyo yondjokana,” ta fatulula ngaaka.
Ta ti, oshituthihango ohashi ningwa ashike oowili dhontumba, ihe ondjokana oya aluhe.
“Ondjokana ohayi ilongekidhilwa, ihayi ningwa oshoka kuume koye okwa piti ko, oshoka oto ke wu toola mo. Tseyeni shoka sha pumbiwa opo mu kuthe etokolo lyondjokana,” ta kumagidha ngaaka.
Aantu naya hulithe po okoondodha omeho nokunyanyudha oshigwana.
“Yamwe ohaya kalya omikuli okuninga oshituthi shohango shi kale shondilo, ihe konima yohango omaupyakadhi otaga holoka,” ta popi ngaaka.
Ta ti, omaupyadhi ngoka haga holoka konima yohango, ohaga kanithithitha ombili momagumbo. Uushona ta ti, ondjokana ohayi tekulilwa omuntu okuza kuushona.
“Oholongosimba ngele tayi nuka ekelo, oyi na etumwalaka kokanimona ke li mepunda, sho shoka esiku taka valwa olyo esiku taka tameke wo okunuka,” a gandja oshiholelwa.
Ta ti, shoka otashi ti, aanona sho taya koko ohaya longwa kaakuluntu yawo okugwanithapoiilongayomomagumbo,taya longwa nokulongekidhilwa onkalomwenyo yomondjokana yaaluhe.
“MOshiwambo, ngele omookanwa ke shi iilonga yomohombo, koondjakana oha tidhwa ko,” ta popi ngaaka.
Aanona ohaya ilongele okuza kaakuluntu yawo. Nena ngele omusamane oha dhenge yina komeho gaanona, nayo sho taya koko osho taya ningi oshoka kaye wete kutya kashi li mondjila. “Yina ngele oha panga he iikulya, naanona sho taya yi moondjokana osho taya ka ninga oshoka osho ya ilongo okuza megumbo,” ta fatulula ngaaka.
Uushona okwagwedha po wo ta ti, eesimaneko oshowo omikalo nadho oshitopolwa shondjokana.
Micheal Shikweyo omwiitaali gwoongeleka dhopambepo okwa li wo a gandja omandhilandhilo nomagwedhelepo ge.
Ta ti, sha gandjwa kuKalunga ihashi kuthwa kumwe komuntu.
“Oshituthi hasho ondjokana, ombepo yokuhokana ngele oye ku adha nena, ihe owuna kuume koye ngoka wa hogolola okutopolelathana naye onkalamwenyo nohole yaaluhe, shi ninga ethimbo olyo ndyoka,” ta popi ngaaka.
Ta popi ta ti, omusita oha yambeke kehe ondjokana ye ya komeho ge, noya za kuKalunga, ihe iha pula ngele ope na oondya tadhi ka liwa.
Shikweyo ta ti, ohaku ti kuume koye ku shi esiku ta valwa.
Ta ti, itashi ti ngele aantu oya kala no muntu omimvo 20, ihe kape na ohole pokati naya hokane.
“Oomwenyo mbali ngele odha pambathana, esiku dha monathana ihali ya lulwa, shoka sha simana ohole, elongelokumwe nombili yaaluhe.
Ta gwedha po ta ti, ondjokana ya longekidhwa noya za kuKalunga ye mwene, ihayi kala yi na omaupyakadhi.
“Nongele oga holoka ohaga kandulwa po kaape na uupyakadhi wa gwedhwa po,” ta popi ngaaka.
Ta kumagidha ta ti, ohombo ihayi longele kumwe neliko.
“Oyendji oya thigi po oohombo oshoka oya li ya hokanwa, ya lamba eliko, kaaye shi mpoka lya za, ihe kaye na ohole yoshili,” ta popi ngaaka.
Ombili, ohole yashili oyo omuzalo gwondjokana yaaluhe.