Aatiligane oya pumbwa okugandja evi- Ramaphosa
AATILIGANE Aasouth Africa mboka inaya hala okutopolelathana evi naaluudhe mboka yaa na sha naya thikame opo ya yalulwe, omuplesidente gwaSouth Africa Cyril Ramaphosa ta ti ngaaka mopaliamende.
AaSouth Africa aatiligane oye na oku itaala ya topolelathane evi, osho a li a popi pethimbo ta popile epangelo lye lyi kuthe ko evi pwaa na iifuta yasha okuza kumboka ye na evi olindji unene, shoka sha li sha etwa konkalo yuukoloni nepangelo lyokatongotongo ndjoka ya kala po uule woomvula 350.
Sho a li ta yamukula epulo mOmutumba Gopashigwana moCape Town, Ramaphosa okwa ti aaluudhe oya li ya kuthwa evi lyawo koonkondo pethimbo lyepangelo lyokatongotongo omanga omumvo 1994 inaagu thika, sho oshi li natango oshilalo oshinene kaantu yetu.
Ramaphosa ta ti OFreedom Charter yoANC, ongundu ndjoka ngashingeyi tayi pangele yomo 1955 otayi ti evi nali topolelathanwe naamboka haye li longo.
“Aantu yetu naya vule okutopolelathana evi, naamboka taya ti inashi ningwa naya thikame yo ya popye kutya inaya ilongekidha okutopolelathana evi oshoka shoka osho oshinima sha simana kaantu yetu,” osho a li a lombwele egumbo.
“Itaya ti (mboka yaa na evi) oya hala evi oyo ayeke,”
Ramaphosa ta hiya wo mboka ye li ompinge, mwa kwatelwa naamboka ya li ya popi pondje yoshilongo opo ye ye moompata ndhika opo ku monike eyamukulo li li mondjila.
“Oshilonga shetu osho shika kutya naamboka ye li pondje yoshilongo ye li ompinge noshilongo shawo, ya galuke, tu kaleni omutumba poshitaafula, tu moneni eyamukulo koshikumungu shika shevi. Omakuyunguto hago nando eyamukulo ndika.”
Omakuyunguto pokati kaapolisi naamboka ya li taya ikuthile evi oga li ga lopotwa miitopolwayimwe moSouth Africa, oshoka yamwe mboka yaa na evi oya hala okulongitha omukalo gwaZimbabwe goku ikuthila evi.
Ramaphosa ta ti shika itashi ki idhidhimikilwa nando. “Itatu ka pitika okwaa na elandulathano moSouth Africa ngele otashi ya kokukandula po uudhigu wokwaa na evi. Omakuyunguto hago eyamukulo nando kepulo lyevi.”
Ramaphosa ta ti ompumbwe yevi itayi zi powe mbala ngashingeyi.
“Kumboka tamu ti oshikumungu shevi moSouth Africa otashi lyatelwa pevi, otandi ti, pendukeni ookuume kandje. Itashi ningwa”