Vahapu va tunhilwa moshitukulwa shaShikoto
OMUKULUNHUWILIKI wouhaku moshitukulwa shaShikoto Josua Nghipangelwa ota ti ovanhu vahapu ova tunhilwa ombuto yoCovid-19 mOshikoto. Okwa ti okwa hafifwa unene koshiwana eshi hashi holoka momwaalu munene opo shi ka tunhilwe ombuto yoCovid-19. Meenghundafana a ninga naKundana Etitatu Nghipangelwa okwa popya ta ti ovanhu 14 939 ova vendwa ovenda yavo yotete omanga ovanhu ve li 9 592 ova vendwa ovenda yavo yaxuuninwa yoCovid-19. Okwa ti okwa pandula unene oshiwana shomoshitukulwa shaShikoto eshi shi na ohokwe yokukala sha ka tunhilwa nokukala yoo vali sha xwaxwameka vakwao.
Nghipangelwa okwa ti ombelewa yaye oya didilika ovanyasha tava ende momwaalu munini ngeenge tava i ketunhilo.
“Ohandi kunghulile ovanyasha opo va kale tava topolelafana ouyelele womondjila kombinga yefimano letunhilo lomukifi ou, opo va kale tava xwaxwameke vakwao,” Nghipangelwa ta ti. Okwa popya ta ti ombelewa yaye otai ka ninga oshikonga shetunhilo keefikola domoshitukulwa shaShikoto, nelalakano lokuyandja ouyelele kovanafikola novahongifikola nghee sha fimana kovanhu ngeenge va tunhilwa. “Onda hala keshe omunhu a kale a mona omhito opo a kale a ka tunhilwa shaashi ngeenge omunhu a tunhilwa oha kala e na omhito i li pedu yokukwatwa kombuto yoCovid-19,” Nghipangelwa ta ti.
Okwa popya ta ti otava ka ninga yoo vali oshikonga keenhele dokukwatela opeendjela opo va xwaxwameke ovakulupe navo va ka tunhilwe ombuto ei, shaashi ovakulupe navo ova pumwba okukala va tunhilwa opo va kale ve li meameno. “Omwaalu wovanhu tava kwatwa kombuto yoCovi-19 omafiku aa mOshikoto, okwa didilikwa ovanyasha ovo unene tava kwatwa kombuto,” Ngipangelwa ta ti. Okwa yelifa ta ti moipangelo yomoshitukulwa shaShikoto omu na ashike ovanhu vashona ve li kepango lombuto yoCovid-19. Nghipangelwa okwa kunghulila ovanhu opo va twikile nokuliufa komilandu doCovid-19 opo ku shunifwe etandavelo lombuto pedu.
– fhamalwa@nepc.com.na