Omeya ga ningi oomwedhi ndatu ga pata mOshikoto

NONANDO aakalimo yomoshitopolwa shaShikoto ya ningi oomwedhi ndatu kaaye na omeya gokopomba, otaku fekelwa natango tashi ka pula oshiwike komeho, opo oshitopolwa ashihe shi mone omeya.

Omunambelwa omukuluntu mendiki lyokwaandjaneka omeya moshitopolwa shaShikoto Stevenson Tuukondjele okwa ti onkalo oya nayipala noonkondo, ihe okwa kondjo nokukambadhala nkene ye na okukandala po uupyakadhi mboka.

“Sho tatu popi ngeyi, oshitopolwa ashihe shaShikoto osha dhigupalelwa kuupyakadhi womeya. Oombelewa dhetu odhi na ashike otenga yimwe ndjoka tayi aandjaneke omeya moshitopolwa ashihe, unene poosikola nokookilinika,” ta fatulula ngaaka.

Tuukondjele ta ti, otenga yimwe inayi gwana, onkene oya pumbwa eyambidhidho nando onootenka ntano, opo dhi vule okuandjaneka omeya mpoka ga pumbiwa unene. “Uupyakadhi mbuka okwa li wa etwa tango kopaipi ndjoka onene ya zi pokati kOndangwa nOnankali ndjoka ya kala tayi topa iikando oyindji noya li ya gandja uupyakadhi kolusheno ndoka halu pombitha omeya, nolusheno ndoka olwa kala nokugwa ko,” ta hokolola. Ta ti, olusheno sho lwa gu ko okwa li sha eta uupyakadhi mboka opo omeya kaaga ende. “Pethimbo ndika olusheno olwa longwa, ihe natango katu na natango uuyelele wi ihwa po kutya omeya otaga ka thika mOshikoto ashihe momasiku twa taalela,” ta popi ngaaka.

Tuukondjele okwa ti, ngele opwa holoka epuko opaipi ya topa natango nenge olusheno lwa gu ko, omeya mOshikoto ashihe otaga ka thika mo omwedhi tagu ya, nuupyakandi mbuka otau tsikile. “Oshili opaipi ndjoka yomeya oya kulupa. Ngele otandi tengeneke mondjila oopaipi ndhoka nkene dha tulilwe po omanga oshilongo shika inaashi manguluka,” ta ti ngaaka. Ta gwedha po ta ti, etengenekothaneko lyokulundulula opaipi ndjoka mu tulwe yimwe ompe, olyi li metifa.

Oya tegelela ashike omayamukulo ga hugunina okuza koombelewa dho pombanda. Tuukondjele okwa kumagidha oshigwana shi kwate nawa omeya ngoka tashi mono, kutya oongoka taya aandjaneke nenge ongoka oshigwana tashi kutha momithima.

“Uupyakadhi atuheni otu wu weteni, ashike otatu tsikile okukondja sigo twe u sindi, nonando ka shi shi nena ,” ta kumagidha ngaaka. Kansela gwoshikandjohogololo shaKankolo Hans Nambodi okwa ti uupyakadhi womeya owa ningi oomwedhi ndatu paife, ihe sigo oompaka kapena shoka sha ningwangwa po.

“Otwa kala nokulombwelwa kutya oopaipi dhomeya otadhi topa. Nena ngele uupyakadhi ou shiwike oshike itau kandulwa po. Oshigwana otashi mono iihuna omolwa kaashina omeya,” ta popi ngaaka.

Ta ti, oopaipi ngele odha kulupa napu tulwe dhimwe oompe, opo uupyakadhi mboka kaau holoke we monakuyiwa.

“Shika osha eta oshigwana shi ka nwe momithima oshowo momatope, nonando omeya ngoka inaga yela nawa,” ta nyenyeta ngaaka. Ta popi ta ti, okuteka omeya okuza moondungu oshowo momithima otaku vulu oku eta omaupyakandhi gamwe ga gwendhwapo, ekanitho lyoomwenyo oshowo iimuna. “Oshigwana ohashi kala sha kalela oondungu ndho meya, taya ningi omalufo ngoka a mona endini limwe nenge gaali, oye omunelago,” Nambodi ta popi ngaaka. Nambodi okwati, uupyakandhi mboka owa pumbwa okukandulwa po meendelelo lela. Kansela okwa ti, omeya ngoka oga kala haga patuka go taga pata.

Omikunda ashike ndhoka dhili po pepi nOndangwa dha kala tandhi mono uundoda meya omanga ndhoka ndhili kuunzilo wOshikoto ndhili muupyakandhi.

“Omeya ogo omwenyo, onkene omuntu ena omwenyo ita vulu okuhupa keena omeya ga yela,” ta popi ngaaka. Oshifo shika okwali sha ningi omapekapeko okuza kaakalimo yomomikunda dha yooloka moshitopolwa shaShikoto, no kwali ya popi omanyenyeto gawo.Soini Nangolo gwomomukunda Onkumbula okwa ti, eta lyomeya omayelele ka yeli shi we. “Ota tu ningi oomwndhi ndatu ta tu ende iinano, ta tu ka konga hoka ta tu mono omeya opo tu vule okulya,” ta popi ngaaka. “Iikutu yetu twa zala komalutu oya nigila oshoka ita tu vulu okukosha ka pena omeya. Omeya ngoka ta tu mono ko kandonda, oha tu galongitha okuteleka nenge okunwa,” Nangolo ta hokolola.

Ta indile ta ti, uupyandhi owaninga ethimbo nuule, no ya hala wa kandulwa po meendelelo. Mathew Onesmus ayambukile kOnyuulaye okwati, ka pena uupyakandhi uuwinayi wafa womeya.

“Shika otandi vulu okushipingathanapo nolusheno. Ota tu mono iihuna omeya oga ninga ethimbo unene itaaga ende. Ota tu nu omeya inaaga yela,” ta ti, uveni onkugo ndjika.