Kwafela Oshiwana Foundation onghee ngaa ta twikile nokuyambidida oshiwana

Ehangano Kwafela Oshiwana Foundation onghee ngaa natango tali twikile nokuyandja omakwafo koshiwana shi li moluhepo eshi la yambidida ovanafikola vavali voukadona va tungilwa onduda yokunangala yoshipeleki Etine komukunda Oshaakondwa, moshitukulwa shaShikoto.

Okwa didilikwa ovanafikola va kala ve na omhumbwe yonduda yokunangala oule wefimbo lile, omo vati va kala hava nangala mumwe naxekulu, novamati vavali vambulavo.

Efiku olo ehangano ola yandja yoo vali oukutu voufila, oshivelelwa kovanafikola, oikutu, ombete netalashe lokunangala nosho tuu oikwafifo ikwao ya yooloka. Ehangano eli olo limwe lad idilikwa hali yandje omakwafo kovanhu ve li moluhepo koitukulwa yokonooli.

Omukulunhu wehangano loKwafela Oshiwana Foundation Paulus Kornelius okwa ti ehangano lavo otali lalakanene okukwafa oshiwana ashishe eshi shi li momhumbwe, onghee okwa denga omufindo ta ti elalakano lehangano oku yambida oshiwana eshi sha pumbwa omakwafo. Kornelius okwa ti ota lalakanene okushakeneka epangelo ondjilakati mokukondjifa oluhepo nondjala.

“Ovanhu ve li momhumbwe nava kale tava kwatafana nombelewa yetu yehangano i li mOndangwa, opo va kale va yambididwa noipumbiwa va pumbwa,” Kornelius ta ti.

Okwa ti ombelewa yaye oya kala nokulopotelwa kuxekulu younona vavali vovanafikola hava nangala monduda ve li vatano mwa kwatelwa xekulu yavo. Kornelius okwa ti naashi osha eta opo ehangano lavo li kale la landa oitungifi opo li tungile ounona onduda yokunangala. Okwa weda po ta ti keshe omunhu okwa manguluka opo a kale e va waimina, vo va shiive va longele kumwe nokuyambidida oshiwana shi li moluhepo. Pefimbo tava tambula ko onduda yavo, ova popya tava ti ova pandula unene ehangano Kwafela Oshiwana Foundation eshi li na oshisho noshiwana shi li moluhepo.

Josofina Lukas weedula 14, okwa popya ta ti paife itava kala vali tava nangala monduda va finana mo shaashi paife ova pewa onduda yokungala yakula. Okwa popya ta ti natango ova pumbwa omakwafo ngaashi oikulya noidjalomwa, osho yo oikwafifo yofikola.