Frans Indongo Trust a yandja oikwafifo yoCovid-19 kouministeli wouhaku
Ehangano loFrans Indongo Trust ola yambidida ouministeli wouhaku nonghalonawa eshi la yandja omashina 10 okufudifa ovanhu ve li kepango lombuto yoCovid-19, ola ya ndja yoo neefewa mEtine la dja ko moWindhoek.
Oikwafifo oya yandjwa opo i kale tai kwafele ovanhu tava kwatwa kombuto yoCovid-19, omanga eefewa okukaleka po oukoshoki opo ku keelelwe etandavelo lombuto.
Oikwafifo ya yandjwa oi li pongushu yoshimaliwa omiliona N$1. Moshipopiwa shaye ominista youhaku nonghalonawa Dr Kalumbi Shangula okwa tambula ko oikwafifo nepandulo linene. Shangula okwa ti oikwafifo oye ya pefimbo liwa shaashi oministeli oya kala ya pumbwa oikwafifo yokulongifa komandiki ouhaku moshilongo.
Okwa popya ta ti oikwafifo ei otai ka topolelwa omandiki aeshe ouhaku moshilongo opo i dule okukala tai longifwa kovanhu.
“Omahangano aeshe naa kufe ko oshiopaenenwa opo a kale taa yambidida oministeli youhaku opo ashike tu dule okukondjifa ombuto yoCovid-19,” Shangula ta ti.
Okwa popya ta ti ovanhu nava twikile nokukala tava i ketunhilo lombuto yoCovid-19 shaashi osha fimana ngeenge omunhu a tunhilwa.
Okwa yelifa ta ti ngeenge omunhu a tunhilwa oha kala e na omhito i li pedu yokukwatwa kombuto, sho vali ohashi shunifa etandavelo lombuto pedu.
Shangula okwa ti osha fimana ngeenge ovanhu tava longele kumwe mokukondjifa ombuto yoCovid-19, shaashi eshi osho omukalo muwa wokushunifa etandavelo lombuto pedu.
“Onda pandula ovanailonga voundjolowele eshi va kala nokulonga noudiinini pefimbo lombuto ei, eshi va kala nokuungaunga novanaudu moipangelo efimbo keshe. Onghee natango ohandi indile ovanailonga voundjolowele opo mu twikile nokulonga nelitulemo mokuyakula ovanaudu moipangelo,” Shangula ta ti.
Moshipopiwa shaye omunashipundi wehango Frans Indongo Trust Dr Solly Amadhila okwa popya ta ti ehangano lavo otali lalakanene okushakeneka epangelo ondjilakati tashi pitile mokuyambidida ouministeli wouhaku.
Amadhila okwa ti ombelewa yaye oya kala ya didilika omashongo a taalelwa koumnisteli wouhaku okudja omudo wa dja ko eshi ombuto yoCovdi-19 ya tukuka moNamibia.
Onghee naashi osha eta opo ehangano Frans Indongo Trust opo li yambidide ouministeli wouhauku noikwafifo mokukondjifa omukifi.
Okwa popya ta ti oshikando sha dja ko ehangalo lavo natango okwa li la yandja oshimaliwa shomiliona N$1 kouministeli wouhaku mokukondjifa ombuto oyo tuu ei.
“Elalakano lokuyandja oikwafifo ei okukwafela ovanhu tava kwatwa kombuto opo eemwenyo davo di kale da xupifwa,” Amadhila ta ti.