Omulumentu ngoka i ilundilile eso a pewa egeelo
Omulumentu gwomoshilando Massachusetts ngoka a li a ningi onkambadhala yokulongitha uulingilingi moshikonga shokukwathela aanangeshefa shi na sha noCovid-19, nokwa li a longitha uulingilingi kutya okwa sa opo a henuke opolisi okwa pewa egeelo lyoomwedhi 56 mondholongo.
okwa li a fundju kutya oku na oongeshefa dhi li ne oonene dha pumbwa eyambidhidho lyoshimaliwa shi thike konyala US$544 000 okuza kepangelo lyopashitopolwa.
Konima sho a li a patululilwa oshipotha omvula ya zi ko, Staveley okwa li a longitha oombaapila dhiifundja noonomola dhoohauto dha yakwa nokuya po nondunge kutya okwa idhipaga. Oye omuntu gwotango a patululilwa oshipotha okulongitha uulingilingi opo a konge omikuli.
Aapanguli oya li ya yembe omaihumbato ge momushangwa gwawo: “Okwa mono onkalo yeliko ya nayipala onga ompito yokwiiyambapaleka sho a kutha po shoka sha li sha nuninwa mboka ye li mompumbwe.”
Ya tulwa miilonga pokati kaMaalitsa 2020 naMai 2021, US Paycheck Protection Program (PPP) oya li ya pitike oongeshefa oonshona ndhoka dha dhengwa dha luluma komukithi gwoCovid-19 opo dhi ninge omaindilo gomikuli dhopaumwene dhi na iihohela yi li pevi opo dhi vule okufuta aaniilonga osho wo okukwathela moompumbwe dhilwe.
Stavely, 54, pamwe nakuume ke miilonga David Andrew Butziger, 53, oya li ya ningi omaindilo noombaapila dhiifundja kutya oyo ooyene yoongeshefa dhomahala gokulila osho wo ongeshefa yilwe ya ithikamena yedhina Dock Wireless, ndhoka adhihe dhi na anuwa aaniilonga oyendji haya futwa.
Paushili, omahala agehe ngaka oga pata nale naDock Wireless kaya li ye na aaniilonga. Shi ikwatelela koshikondo shuuyuuki, omukwashigwana gumwe oye a li a yakele ko aanambelewa yetanga lyopolisi omanga omaindilo ga li ge li metifa natango. Aalumentu ayehe pya li ya mangwa po muMai 2020, naStaveley okwa li a pewa egeelo a kale megumbo.
Konima yiiwike, okwa li a tete ko okatenda hoka haka ulike kutya oku li peni, ee ta thigi po uumbaapila e u shanga kombinga yokwiidhipaga, nokupaakinga ohauto ye inaayi pata pefuta, sha ikwatelela kuuyelele wa za koshikondo shuuyuuki.
Ashike mboka ya li ye mu shi inaya itaala ko oshinima shika nepangelo olya tameke oku mu konga pokati kaMai naJuli 2020. Moomwedhi ndhoka ndatu, Staveley okwa longitha anuwa oondokumende dhiifundja, osho wo oonomola dhoongodhi dha adha puntano dha yooloka opo a ende moshilongo inaa kwatwa.
Okwa li a mangwa momasiku 23 Juli 2020 muumbugantu waAtlanta, Geogia.
Okwa li a itaala kutya oku na ondjo mokulongitha uulingilingi osho wo okundopa okuholoka kompangu.
Ota ka kala mondholongo uule woomvula ne netata.
Butziger okwa li a itaala wo kutya oku na ondjo melongitho lyuulingilingi nota ka pewa egeelo omwedhi tagu ya.