Oonakulwa vakulu va kwatwa po molwokukondekela minista metungo
Etanga lopaukwaita lowina ola ponokela onhele yoyoongalele yedina George’s Conference Centre moPretoria, onguloshi yEtine omo ominista yeameno Thandi Modise, omuponhele waye Thabang Makwetla, nominista mombelewa youpresidente Mondli Gungubele va li va kondekelwa koonakulwa vakulu.
Etanga eli ola li la ifanwa opo li uye okuwaimina opolifi yopaukwaita oyo ya li tai nyengwa koonakulwa vakulu ovo va li va hala okufininika eeminista edi opo va popye navo shi na sha nomakwafo oo va hala okudilila kepangelo.
Omupopiliko wopolifi Brigadier Vish Naidoo okwa ti oonakulwa vakulu ve li 53 ova kwatwa po, omanga vatatu va mona oiponga. Mokati kaavo va kwatwa po omwa li ovakainhu vaheyali.
Naidoo ta ti, moshiningwanima omo ina mu umbwa nande eendjebo, ashike ovo va ya koshipangelo ova ehamekwa ashike pefimbo ovapolifi novakwaita va li tava kendabala okuhanauna engudumano olo.
Ava ova li tava pula opo vati va pewe omhito va ye meenghundwa nomupresidente Cyril Ramaphosa nomuponhele waye David Mabuza.
Gumende okwa hokolola kutya ongudu oyo oya anya okulikunda osho ya li ya hala okupopya nomupresidente nomunhu umwe e lili.
“Eshi ve tu fitikinina mo ovapolifi ovo have tu kalele po kava li tava dulu okuninga sha, otwa kala ngoo nee omutumba twa teelela opo tu lombwele ketanga leameno kutya natu ninge po shike.
Lwazi Mzobe oo e li umwe womoonakulwa vakulu ye okwa ti oilyo yetanga leameno oya tameka okuumba eendjebo eshi ye ya monhele omo va li va ngudumana. Ta ti ovanhu vavali ova yashwa nova twalwa koshipangelo. Ta ti okwa li va pewa elombwelo opo aveshe va nangale pedu, nokava li ve na nghee ova ninga ngaashi tava lombwelwa.
Ova li va hala oku tu dipaa.