Masten Wanjala: omudhipagi gwaanona a dhipagwa koshigwana
ENGUNGO lyaantu muuningino waKenya olya dhipaga omulumentu ngoka a ihokolola ye mwene kutya ye omudhipagi, nokwa dhipaga aanona ye vulithe po10, konima sho a iyaka mondholongo. Masten Wanjala okwa li a kongwa kaakwashigwana sigo omegumbo lyi li mondoolopa yaBungoma, moka a dhengelwa sigo omeso.
Opolisi oya ningi omasiku tayi kongo Wanjala ngoka sho a iyaka mondjedhililo. Omulumentu nguka okwa li a hokolola kutya okwa dhipaga aanona aamati ya konda 10 muule woomvula ntano.
Okwa ihokolola kutya okwa li he wu pe iingangamithi, nopomathimbo gwalwe okwa nu ombinzi yawo.
Sho i iyaka mondholonga anuwa okwa matuka noku ka holama kegumbo lyaakuluntu ye hoka a ningi ethimbo a za ko, ihe gumwe gwomaashiinda oye mu mona nokuponokela egumbo lyaandjawo, moka ye mu pondele.
Okwa li a inipi mo momake gamushiinda e ta matuka noku ka hondama pegumbo limwe lyi li mondoolopa moka, opolisi moBungoma osho ya lopota.
“Katu shishi kutya okwe shi pondola ngiini oku enda okuza koNairobi noku ya komukunda gwawo ngoka gu li kokule methimbo ehupi. Aakwashigwan momukunda oyo ye mu mono tango e taye mu dhipaga omanga opolisi inayi thika. Tse otwe ke shi uva konima sho oshiningwanima sha pwa nale,” Musyoki Mutungi ngoka e li omukuluntu gwopolisi ta ti.
Aapolisi yatatu mboka ya li miilonga pethimbo omulumentu ngoka a iyaka mondholongo, ngashiingeyi otaya pangulilwa uuhasha nokwaa itula moolonga.
Opolisi tayi ti okwa ka dhimbululwa owala kutya okwa iyaka mo ongula yEtine sho opolisi ya tameke oku ithana omadhina gaanandholongo.
Oyendji ngashingeyi otaya pula opo omukuluntu gwopolisi a ikuthe miilonga omolwoshinima shika.