Aalongwa ya zalekwa ooshako kaalongi yawo
AAKULUNTU yaalongwa yamwe posikola Iipundi Combined School moshitopolwa shaShikoto otaya nyenyeta kutya aanonoayawo oya taalela omashongo okuza kaalongi sho ye ya zaleke ooshako komalutu gawo.
Omukuluntu gumwe Maria Shekunyenge ngoka e na omona a zalekwa oshako okwa pula kutya, oshike sha ningwa kaanona yawo oshinene itaashi vulu okukandulwa po.
“Aalongi otaya longitha oonkondo dhawo sha pitilila, ihe shika otashi yemateke omitima dhomuvali kehe e na okanona ka zalekwa oshako,” ta nyenyeta ngaaka.
Otaku hokololwa kutya aalongwa mboka okwa li ya zalekwa ooshako dha shangwa “Ondimukolokoshi omanga dhimwe dha shangwa ondi na omulumentu”.
Aalongwa okwa li ya lombwelwa anuwa kaalongi kutya naya zale ooshako ndhoka uule woshiwike shimwe, onga egeelo lyawo.
Omukuluntu gumwe ngoka edhina lye lyi shiwike kuKundana okwa ti, iitya mbyoka ya shangwa kooshako dha zalekwa aanona yawo otayi yemateke yo iiwinayi. “Aanona yetu koosikola ohaya yi ya ka longwe ihe ihaya yi ya ka mone omashongo okuza kaalongi yawo. Omulongwa ita vulu okuzala oshako kolutu lwe, osha puka noonkondo,” ta popi ngaaka.
Ta gwedhapo ta ti, uuna aanona ye na sho ya yona, oye na okumona egeelo, ihe omageelo ogendji taga vulu okupewa aalongwa.
“Oshike inaaya pewa nando egeelo lyokulima omwiidhi nenge ngele oya nyengwa ya ithane aakuluntu opo ya kundathane shoka shi na okuningwa po,” ta pula
Ta ti, iitya ya shangwa kooshako hoka, iiwinayi notayi teyagula po natango aanona yawo. “Sigo oompaka inatu pewa uuyelele kutya aanona yetu oya yono shike, opo ya zalekwe ooshako,” ta ti ngaaka.
Omukuluntu gwelongo moshitopolwa shaShikoto Aletta Eises okwa ti, okwa li a lopotelwa oshiningwanima shoka, ihe omakonaakono oge li metifa.
“Pethimbo ndika inandi mona natango uuyelele awuhe, ashike otandi ke u tseyitha uuna omukuluntusikola a mana nomakonaakono ngoka,” Eises ta fatulula ngaaka.
–