Baituti babakungulezwi kwatuko baka lifelwa

Baituti babafitelela mashumi alobapeli kuzwelela kwasicaba sesi ngulezwi kwatuko mwalikiliti za Zambezi, Kavango ya Upa ni ya Wiko bafilwe neulo yakulifelwa mwalituto zabuikezezo ni zabupangapanga, kwasikolo sa COSDEC kikatengo kaPalms for Life Fund Namibia. Lituto zeo likafiwa kwa COSDEC Tukurenu mwa Rundu, mi kuiputezi lituto zamakalo zalikweli zesilezi unumwaha, ili zeka ama hahulu zalipalo ni sikuwa.

Baba kalifelwa kihona baka ñoliswa isaho mwakalulo yapili mwalikalulo zecwale ka kuituta kuyala sitina ni kukubula, kuluha litino, kamuhelo, zakufasulula, kamaiso yaliofesi, kunungahanya lisipi ni kushenga. Muongaongi mwanaha Namibia wakatengo kaPalms fo Life Change, yaokamezi likiliti zaKavango Lucas Nsinano naize tuso yefiwa kwasicaba sa Mabarakwena, ika balumelela kufumana lyano mwalitaba zabuikezezo kuli bakone kuba babaitutile.

“Katengo kaPalms for Life Fund kakalifela likweli zesilezi ili tukiso yalituto zaisaho,” nekubulezi Nsinano. Hana bulela kanako yakukwalula simubuso muetapili wamutayi waCOSDEC Tukurenu Clemency Kafuro nalumbile katengo kaPalms for Life Change kaneulo yeka file, kakubulela kuli ikatusa baituti babasiile sikolo kuzwelela kwasicaba sa Mabarakwena kufumana lituto sakata zekacinca mayemo abupilo bwabona. “Neulo yakulifela sikolo yalilimo zetalu ibata kufelisa taba yakusafumana lituto kubabanca basicaba sa Mabarakwena.

Mulelotuna kiwa kufukuza bubotana hala sicaba sesi shebile mwanaha Namibia, kakufukuza lisitataliso zetisa kuli babanca baMabarakwena basike bafumana lituto zabuikezezo,” nekubulezi Kafuro. Nasusuelize hape baituti babaketilwe kufumana lituto kuswalisa katata nikulemuha babakabatusa mwalituto zebaketile. Muinasipula wakatengo kasikiliti sa Kavango ya Upa, Damian Maghambayi, niyena nasusuelize baituti kukumalela lituto zabona, nikusebelisa lyano lebakafumana kuitukiseza kukena mwalitaba zamisebezi.Baitutiba37kuzwelela mwasikiliti sa Zambezi, ni ba21 ni ba22 kuzwelela mwalikiliti za Kavango ya Upa ni Wiko nebaketilwe kufumana neuolo yakulifelwa. Baituti babañwi ba300 kuzwelela Gobabis, Tsumeb ni Ondangwa nibona bakalifelwa.