Oishoshela otai kala peepelesenda 3.75
Okakomitee kombaanga yopokati yaNamibia (Bank of Namibia) oka tokola opo eepelesenda doishoshela oyo hai wedwa komikuli odo hadi pe eembaanga (Repo rate) i twikile oku kala po3.75.
Edi oda shivifwa kungoloneya wombaanga ei Johannes !Gawaxab.
Momushangwa oo a pitifa mEtitatu, !Gawaxab okwa ti okwa tokolwa opo oishoshela oyo ikale pedu nelalakano oku xumima komesho eliko loshilongo olo natango lili pedu omolwa oCocid-19.
“Pefimbo eli, oishoshela yorepo rate oya talika ko ili nawa opo i kale ke po ekwatafano loufikepamwe wondjudo yoshipaliwa pokati koDollar yaNamibia noRand yaSouth Africa, osho tashi kawafele yo oshilongo opo shi nange oinakuwanifwa yasho yopashimaliwa. Eliko lounyuni otali xwepopala, nonande exwepopalo eli ola yooloka koshilongo noshilongo,” ta ti ngaho.
!Gawaxab ta ti Namibia okwa didilika ekulo liwa kondjele yoilongomwa yomoshilongo poshitivali shetatamudo sho2020 oku yelekanifa nifimbo ngaashi olo mo2020. Eyokomeshe eli ola kwatakanifwa kekulo longeshefa moikondo ngaashi eehotela, eenhele dokulila, eefitola nomalandifo amwe, oikwashi, oilonga imwa yopambelewa, naayo yomakwatafano.
“Ewopedu moinyangadalwa yopaliko okwali unene ya didilikwa moikondo ngaashi yoikwamina, ounamapya noimuna, omatungo, outalelipo noshoyo oshikondo shyeendifo, naasho shomapungulo. Moku ya komesho, eliko okwa teelelwa li kule nopelesenda 1.4 mo2021 nosho yo eepelesenda 3.4 mo2022,” ngoloneya ta ti. Omhito yokomudo yoku eta omutumbo ile ewo lengushupalo loshimaliwa moule weemwedi omuwoyi dotete do2021 ola ya pombada neepelesenda 3.5 oku yelekanifa neepelesenda 2.2 domudo wadja ko. Ewo eli ola li la etifwa koipindi moshikondo shoikulya noshoyeendifo.
“Eshi osha etwa unene keshongo lali la taalela etandavelo nefikifo loikulya yonhumba kovalandi, noshoyo eyo pombada londado yomahooli mounyuni aushe. Keshe komwedi, ewo longushu yoshimaliwa paiyadi ohali i fiyo hanga opeepelesenda 3.5 muSepeteba 2021, oku dja peepelesenda 3.4 muAguste 2021.
“Oupokati wewo longushu yoshimaliwa pauyadi waNamibia owa tengenekelwa peelesenda 3.7 momudo 2021, osho shili pedu kanini koupokati womudo wadja ko,” !Gawaxab tati.
Omushangwa owa twikila noku nyola tau ti okakomitee oka twikila taka ti eandjaneko lovenda yoCovid-19 ina li lixwa po nosho yo ehalo lokuvedwa moshiwana oili oimbide oyo tai i moshipala ekulo leliko loshilongo.