Va pewa oikwafifo yeengeshefa
Ovanangeshefa vanini veli 12 ve na oyuuyemo ili pedu ova pewa oikwafifo okudilila kouministeli woukashike kookanhu nonghalo nawa yokaana.
Oilongifo okwa li ya yandjwa kungoloneya waHangwena Walde Ndevashiya pombelewa yaye yoshitukulwa Etine mEenhana.
Ovanhu pewa oilongifo ngaashi eshina lokuxwa oilya, eendoloma domeva, eepapi, omashina okuhondja nosho tuu oilongifo oikwao ya yooloka.
Oilongifo ya yandjwa oya dja kouministeli woukashike kookanhu mopolongalama ya totwa po okuyambidida ovanangeshefa ve na oyuuyeme yopedu opo va yambule po eengeshefa.
Elalakano loingifo okukondjifa ondjala noluhepo moshilongo, opo ovanhu va dule okuli etela oyuuyema yavo vene tashi pitile mokulandifa.
Ouministeli woukashike kookanhu wa kala tau yandje oikwafifo kovanangeshefa vashona ve na oyuuyemo ili pedu moitukuluwa ya yooloka moshilongo, omo ovanhu vahapu va mona omuawa okudilila mopolongala ei.
Moshipopiwa shaye ngoloneya Ndevashiya okwa pandula ouministeli woukashike kookanhu eshi tau kondjifa okulwifa ondjala noluhepo moshilongo tashi pitile mokuyambidida ovanangeshefa va shona.
Ndvashiya ta ti ou oo omukalo muwa kolundulula eenghalamwenyo dovanhu nokukala va yambula po eengeshefa davo dikale pamufika wopombada opo di dule okuninga oshimaliwa sha wana nokunana ovalandi.
“Opolongalama ei otai shunifa onghalo yondjala noluhepo pedu momidingonoko. Ovanhu va mona omauwa otava ka yandja yoo vali oilonga kuvakwao veli mumhumbwe yoilonga opo va kale tava longo meengeshefa davo,”
Ndevashiya ta ti.
Okwa lombwela ovanhu aveshe va mona oikwafifo ta ti nava ka longife oilongifo noudinini nokuyambula eengeshefa davo ndele haku ka pungula oilongifo meenduda davo ita i longifwa.
Okwa ti ovanhu nava kaleke po oilongifo ili mefiloshisho opo i dule okukala tai longifwa efimbo lile.
“Ohandi indile ookansela opo va kale tava talele po ovanhu va mona omakwafo opo va tale ngeenge otava longifa tuu oilongifo ei nawa ile okutala nghee tave shi endi fa meengeshefa davo,” Ndevashiya ta ti.
Titus Hatupopi, umwe womovanhu ovo va pewa omakwafo okwa ti okwa pandula unene eshi ouministeli u na oshisho noshiwana shili momhumbwe.
Okwa ti paife ota ka longa noupu eshi a pewa eshina lokutwa oilya. Ta ti otaka kala ta longo nelitulemo okukwashipaleka kutya ongeshefa yaye otai shi endifa nawa.