Omahepeko omomaumbo mOmusati okwa nyaa komunhu
OMAHEPEKO omomaumbo oku li unene pombada neudo moshitukulwa shaMusati eshi mwa lopotwa oibofa 195 yomahepeko omomaumbo oo a ningilwa unene ounona novakainhu. Neudo mOmusati omwa lopotwa oibofa ya yooloka yoimbuluma ili 435 asihe kumwe.
Oibofa yomadipao oili 41, oibofa yomakwatonghonga 58, oibofa youmbudi yoimuna 114, noibofa youmbudi weteyo lomaumbo oili 27. Omudo wa dja ko mOmusati omwa lopotwa oibofa yomahepeko omomaumbo okwali inini pefimbo ngaali, nopexulilo lomudo oya ka fika po378 omanga oimbofa yoimbuluma aishe yomudo wa djako oili 635. Omukonakoni woimbuluma omupedu Commissioner wopolifi moshitukulwa shaMusati Moses Simaho.
Edi oda popiwa komukonakoni woimbuluma omupedu Commissioner wopolifi moshitukulwa shaMusati Moses Simaho pefimbo lotumba wa li kombelewa yangoloneya waMusati Etitano.
Simaho okwa ta ti elongifo nai loikolwifa olo unene tali dana onghandangala moku longa oimbuluma mOmusati eshi ovanhu hava kala tava longifa omalodu sha pitilila.
Okwa ti opolifi oya didilika oundingosho vahapu vomomikunda hava kala tava landifa omalodu fiyo okeevili da pitilia onghee eshi ohashi kala shidjuu kopolifi opo li kale ya fika keendingosho odo shaashi ohadi kala unene dili momikunda kokule.
“Ovanhu vamwe ove hole okuya noilwifo ya nyika oshiponga koundingosho naashi ohashi heta ngeenge omunhu a nwa omalodu a kale a kwatwa komhepo yokulonga oimbuluma,” Simaho ta ti. Pefimbo lomutumba ngoloneya waMusati Erginus Endjala okwa ti ombelewa oya didilika omwaalu woibofa yoimbuluma mOmusati tai londo yau ka pombada okudja ketameko lomudo neudo.
Onghee naashi osha heta opo ngoloneya a kale a ninga omutumba pamwe nomelelo opamufyuululwakalo, opolifi noshoyo ovanambelewa va dja kouministeli woukashike kookanhu opo va kundafana nghee oimbuluma ina oku shuna pedu moshitukulwa.
Endjala okwa ti ovakwashiwana momidingonoko, opolifi, novafitaongalo nava kale tava longele kumwe mokukondjifa oimbuluma mOmusati.
“Ngeno okwa li twa longela kumwe petameko lemweedi da pita ngeno oimbuluma ina i londa pombada moshitukulwa shetu,” Endjala ta ti. Endjala okwa kunghulila oshiwana opo shi xulife po okukala tashi longifa oikolwifa noingangamwifi shaashi osha nyika oshiponga neenghono.
Omwedi wa djako omulumenhu umwe okwa kwatwa po eshi vati a denge okaana kaye kokadona kodoolopa Oshifo.
Momafiku 07 Marisa neudo omukainhu weedula 23 okwa kwatwa po eshi vati a dipaa okaana kaye noshiwilo ko kamati ke na odula imwe ndele te ka fudike konima yonduda yaye yokunangala meumbo lavo momukunda Ondjindja. Omanga momafiku 09 Marisa koRuacana okwa kwatwa omulumenhu eshi vati a denga omukainhu waye neengonyo moshipala fiyo omukainhu ta mono oshiponga.