Ookalyamupombo oya kwata ko omalungula - opolisi ya kumagidhaa
Opolisi moshitopolwa shaKhomas oya kumagidha oshigwana shi kotokela aakengeleli komalungula oshowo mboka taya longitha omukalo gokulanda iinima kondje yiilongo.
Opolisi okupitila mepeko lyopolisi Etitatu oya ti, oya ndhindhilike iipotha oyindji yaantu ya yugwa iimaliwa yawo okupitila momukala gokulanda iinima kondje yiilonga.
AaNamibia otaya kengelelwa sho taya landa iinima ngaashi iikutu, oongaku, oongodhi dho peke, omakumbatha oondjato niikwawo oyindji yongushu.
Shoka ohashi ningwa okupitila momukalo goku ninga eyindilo lyaashoka wa hala okulanda, okupitila komalungula nokufutako etata lyoshimaliwa lyaashoka wa hala okulandelwa.
Opolisi otayi kumagidha oshigwana kutya nashi kale sha kotekela aantu taya landitha komalungula oshoka oya ningi oyendji, ihe oyendji yo muyo kayeli mo shili.
“Ota tu lopotelwa aantu taya gandja iimaliwa yawo, ya ninga omaindilo giinima ya hala, ihe yali kutegelela iinima yithike ihe itayi thiki,”ta popi ngaaka.
Ta ti, oshigwana nashi kale tashi landa kaantu mboka yeshi nawa, mboka taya vulu okulandula uuna iinima yawo inaayi thika.
“Oyendji otaya longitha omukalo ngoka okuyuga oshigwana iimaliwa. Yamwe aaNamibia, ihe itaya landitha mo shili,” ta ti ngaaka. Saima Nangolo ngoka halanditha iikutu oshowo oohwiki okuza koChina okwa ti, okwakala mongeshefa ndjoka oomvula ndatu paife, ihe ongeshefa paife otayi ende tayi shongola oshoka oshigwana oshakanitha einekelo.
“Aantu mboka taya longitha omukalo ngoka okuyuga oshigwana oyetu kanithitha ookasitoma. Nale okwa li hatu landitha no kaantu mboka kaatushi, okupitila komalungula,” ta nyenyeta ngaaka.
Ta ti, mboka yeya shi oyo ashike haye ya inekele niimaliwa.
Ta gwedha po ta ti, oya kala taye shi enditha nawa okupitila komalungula, hoka kwa ponokelwa paife kookalya mupombo paife.
“Omukalo ngoka handi longitha paife, ohandi landa kehe shoka ookasitoma dhandje tadhi pula niimaliwa yandje, dho ookasitoma tadhiya okufuta oshimaliwa shandje ashihe, iinima ngele yathiki,” ta hokolola ngaaka.
Ta ti, iha pula we ookasitoma dhe dhi fute oshimaliwa she tata lyoshinima.
“Shika ohandi shi ningile uuna iinima mbyoka inaayi thika mbala, nenge ya kanenako, kaandi pulwe okufuta iimaliwa yaantu,” ta fatulula ngaaka.