Singapore a dhipaga omulumentu e na oondunge inadhi ngwana
OMPANGU moSingapore oya tula kohake omulumentu Omumalaysian ngoka e na oondunge inaadhi gwana molwaasho a nuwa a kambadhala oku ndjondjela iingangamithi moshilongo.
Omumwayinakadhona womulumentu ngoka oye a koleke oshinima shika.
Nagaenthran Dharmalingam okwa kala mokati kaamboka ya tokolelwa eso ethimbo li vulithe poomvula 10 sho a li a kambadhala oku yakela uunguto utatu woheroin moSingapore.
Oshipotha she osha kala tashi popiwa kuuyuni oshoka okwali a ningilwa omakonaakono kaatseyinawa yopamandhilandhilo mboka ya mono kutya oku na owala oIQ ano uuwindji woondunge withike po 69. Uupokati woondunge dhomuntu a talika ko e na oondunge dhiihwa po owu na oku kala pokati ko 85 – 115, ngoka e na oondunge ndhili pokati ko 71 – 84, okwa talika ko e na oondunge dhili pevi lela naangoka e na oondunge dhili pu 1 sigo 70 otashi ti oku na uulema wopamandhilandilo.
Ashike epangelo laSingapore olyali lya tala ko omulumentu nguka kutya oku shi sho ta ningi, noku uvite ko uukwatya wonkatu ndjoka a katuka.
Epangelo olya tumu omushangwa tagu ti kutya omulumentu ngoka oku na omadhiladhilo geli nawa nokwali e shi sho ta ningi. MEtiyali, ompangulilo nokuli oya ekelehi onkambadhala yali tayi ningwa kuyina yomulumentu nguka, sho a li a tula mo oshipotha tashi kondjitha etokolo lyompangu. Ompangu oya ti Nagaenthran okwa pewa uuyuki wa gwana noompito dha gwana ngaashi naanaa oveta tayi ti.
Sho oompangu dhomEtiyali dha hulu, Nagaenthran naakwanezimo lye oyali taya kambadhala oku papatela, ashike pokati kawo opu na ekende lyehalasa, noonyala dhawo odha tsakanene kehalasa ndjoka. Omalilagano ogali ga uvika mompangu, omahodhi tanga polonoka, newi lyaNagaenthran olya uvika muule shi igidha ta ti “meme”.