SDFN iyaha mandu a134 mwa Zambezi
KATIMA MULILO – Katengo kaShack Dwellers’ Federation kaNamibia (SDFN), kayahezi batu mwasikiliti sa Zambezi mandu alikana 134. Mandu ane ayahilwe kwa Kongola a54, ni Katima Mulilo mwakomponi ya Choto a80, natambekilwe Lamubulo ni Labubeli viki yefelile. Hana tambeka mandu Likwambuyu waLiluko la Zwelopili yalibaka zaLitolopo ni Matakanyani Erastus Uutoni, nahatelezi kuli tokwahalo yamandu isiala ipahami mwanaha Namibia, kacwalo isunda libaka zalitolopo, mi kubonahalile cwalo bakeñisa kuata kwabatu mwalitolopo mwalilimo zemashumi amabeli zefitile.
“Kacwalo mandu afumaneha cwale hakwani batu kaufela kakuya kalituwelo zebafumana, mi lubona kacwalo kakuata kwalibaka zanaikahela, ili hañata zesika lelwa mi litisa kutotobela, kokutisa kuzuha kwamatuku nikutokwa misebezi fakuipiliseza,” nekubulezi Uutoni. Naize muuso ulemuha tokwahalo yamañi ni mañi yakuluwa ndu nikupila mwamayemo sakata. “Katengo kaSDFN kabonisize swalisano yateñi mwakutusa kuyaha mandu acipile, nikutusa batu baluna baba saipumaneli,” nabulezi. Uutoni naize muuso nosulile masheleñi alikana bolule bamashumi alobañwi (N$91.8 million), ili aboni kuyahiwa kwamandu alikana 3 064 mwanaha kaufela kikatengo kaSDFN.
Hana bulela kwakezahalo yeo mubusisi wasikiliti sa Zambezi Lawrence Sampofu, nalumbile limembala zakatengo kaSDFN kakusebeza katata, mi naba susuelize kuzwelapili kubuluka masheleñi, ni kulifa likoloti kuli babañwi ni bona bafumane kwateñi. “Kakusebeza katata, mukonile kufuma seo silakazwa kimuyahi kaufela wanaha Namibia. Kutokwa mandu ni lisebelezo zalimbuzi kilika zelukataza mwanahaNamibia,”nekubuleziSampofu. Smart Mwiya kuzwelela kwapanka ya
Standard Bank naize panka itukiselize kutusa sicaba mi nefile masheleñi alikana bolule balishumi (N$10 million). Grace Mwiya kuzwelela katengo kababasina mandu naize katengo kana ni limembala ze 1 050, mi nasusuelize babañwi kukena mwakatengo, mi naize mandu alika 437 sayahilwe mwasikiliti.
Yomuñwi wabane bafumani mandu kwa Kongola, Maria Mutelo walilimo ze91, ili yoo ndu yahae neyahilwe kakuba neulo kililuko nasika pata tabo yahae, mi naize nakatazeha kumateha ndu yahae nako ni nako. “Kikalibaka leo neni keni mwakatengo ka Shack Dwellers, nikubona kuli ndu yaka yasilelezwa, kuli hakuba ni sinyehelo yalifiwa,” nabulezi. Katengo kaShack Dweller kaswalisano ni panka yaStandard Bank mwamusha wakuleka matina, kafumani masheleñi nikuyaha mandu afitelela 600 kuzwa silimo sa 2015, mi masheleñi afitelela N$25 million abulukezwi mwapurojekiti yeo.