Ovakainhu ve li momateelelo va lulilwa konghalo ii yokewalanda laEenhana
“OHATU nangala keembete da teka omanga vakwetu vamwe ohava nangala pedu shaashi keembete kaku na omatalashe. Eenduda detu dimwe dokunangala kadi na omivelo, eshi da teka po, onghee ohatu nangala twa tila okulongelwa oilonga yominyonena. Katu li meameno la wana shaashi kapena sha kakuna sha omwaameni womaliko ta dulu okutu amena.”
Aa omatumbulo ovakainhu ve li momateelelo tava hokolola nghee va taalela omashongo konhele i li mEenhana hai kala oomeme ve lihumbata eshi ve uya okuteelela okupulumuna.
Pefimbo Kundana a talela po onhele oyo i na oomeme ve li momateelelo ova hokolola tava ti otava mono oixuna shaashi konhele oku hava di eshi ve uya okutelela kaku na oikwafifo ya wana.
Ova hokolola tava ti ohava futu N$22.50 keshe koshivike ashike ohave lilandele oikulya yavo nokuteleka voo vene.
Ovakainhu otava nyenyeta yoo vali tava ti onhele oyo oya tungwa unene i li kokule noshipangelo shaashi ngeenge tava fetwa ohava mono oixuna yokuya koshipangelo shaashi ihapa kala pevna otuwa yokuyambidida.
Ova ti ovakainhu vamwe ohava monene ounona moixwa mondjila molwaashi oshipangelo oshi li kokule nonhele yokuteelela.
“Ngeenge hatu i koshipangelo oufiku hatu fetwa ohatu ende momilaulu shaashi mondjila kamu na elamba lolusheno onghee eshi oshi li sha nyika oshiponga shaashi ohatu kala ashike tu li moixwa twa nangala hatu fetwa,” tava hokolola.
Victoria Kamati oku na eedula 22, a dile komukunda Oshuuli, okwa hokolola ta ti ponhele opo okwa kala po oule woivike itatu eshi a kala noku ka konga oikuni yokuteleka moixwa kokule shaashi onhele opo ihapa monika oikuni.
Okwa ti osha nyika oshiponga komukainhu e na eteelelo lakula eshi hava ende eendjila diledile navakwao tava ka tyava oikuni kokule. “Ohatu kala tu na oumbada wokulongelwa oushada kookalyamupombo moixwa shaashi komakove oku hatu ka konga oikuni ohaku kala ku na ovalumenhu tava endaenda moixwa,” Kamati ta hokolola.
Omukainhu umwe weedula 30 okwa hokolola ta ti omafiya okutekelela okwa tungwa unene e li pombada eshi hava kala va londa keedopi ngeenge tava teleke.
“Out na omateelelo akula paife eshi shi li sha nyika oshiponga ngeenge twa londa keedopi atu teleke, fyee vali ohatu kala atu pi komundilo momadimo eshi twa londa keedopi,” ta hokolola.
Omukainhu weedula 19 naye okwa lombwela Kundana ta ti ponhele opo ope na ashike oundjuwo ve li vavali hava longifwa kovakainhu aveshe ve uya okuteelela okupulumuna.
“Ngeenge omunhu wa hala okulongifa okandjuwo oto hange po vali vakweni ve li momukweyo wokulongifa okandjuwo eshi pehe na oundjuwo va wanena ovanhu aveshe,” ta hokolola.
Onghee ovakainhu ova indila opo elelo lodoolopa yaEenhana li tule po elamba lolusheno mondjila ya uka koshipangelo, okutula po omwaameni womaliko komuvelo opo va kale ve li meameno, okutunga oundjuwo va wana noshoyo okulanda eembete di na omatalashe.
“Ohatu indile muni waEenhana opo etu ningile omafiya e li pedu shaashi ihatu dulu vali okuteleka komafiya a tungwa pombada,” tava ti.
Meenghundafana a ninga naKunda kombinga yoshikumungu eshi, omupopiliko welelo lodoolopa yaEenhana Paulo Shilongo okwa ti muni wEenhana naye okwa didilika kombinga yonghalo ii nomashongo a taalelwa kovakainhu ve uya okuteelela okupulumuna kewalanda laEenhana.
Okwa ti otashi pula oshimaliwa opo ewalanda li kale la longululwa nokutulwa eembete dipe onghee Shilongo okwa ti elelo lodoolopa oli na tete okulongekida oshimaliwa shokulongifwa okulongulula oinima ya teka konhele oko haku di oomeme ve li humbata.