Ekangha lovanailonga mOndangwa la xula
Omunambelewawiliki welelo lodoolopa yaNdangwa Ismael Namgongo okwa ti ovanailonga va muni waNdangwa ovo va ninga omafiku ve li mekangha ova shuna koilonga Omaandaxa.
Okwa ti ekangha ola xula oshivike sha djako Etitano konima eshi elelowiliki lodoolopa la ninga omutumba novanailonga opo va kale va shuna koilonga.
Namgongo okwa yelifa ta ti ovanailonga ova dimina ewedelo leendjambi davo nee 3% odo da tulwa po kombelewa ya minista weedolopa nomahambule po okumikunda.
Edi Namgongo okwe di popya eshi a ninga eenghundafana naKundana Etivali eshi a hokolola ta ti omayakulo keembelewa delelo laNdangwa okwa aa luka paife shaashi ovanailonga aveshe ova lukila koilonga.
“Ovakalimo vomodoolopa yaNdangwa nava manguluke okukala ve uya keembelewa detu okukonga omayakulo ngaashi okufuta omeva naosho tuu omayakulo a yooloka,” ta ti.
Ovanailonga vomelelo laNdangwa okwa li va ninga omafiku a heyali ve li mekangha tava pula e wedelo leendjambi davo 10% konima eshi vati va ninga efimbo lile ina va wedelwa.
Ovanailonga okwa li hava kala alushe va ngudumana poshivelo shombelewa yavo va teelela e nyamukulo okudilila kouministeli weedoolopa nehambule po lokomikunda.
Namgongo okwa ti tete ovanailonga okwa li va lombwelwa kutya otava wedelwa 3% ashike ove shi anya shaashi ee 3% odi shona.
Okwa ti minista Erastus Uutoni okwa li a pitifa omukunda u na ouyelele kombinga yovanailonga vomelelo laNdangwa tava wedelwa nee 3% ashike ka kwa li va hala.
Minista wedoolopa nomahambule po okomikunda Erastus Uutoni okwa ti eliko loshilonga ola shuna pedu paife onghee ka pena oshimaliwa sha wana opo ovanailonga va kale va wedelwa nee 10% edi tava pula.
“Ngeenge eliko loshilongo ola shuna kouwa opo ashike a dulu okukala twa wedela ovanailonga nee 10%,” Uutoni ta ti.
Oshivike sha djako eshi a ninga eenghundafana naKundana mayola wodoolopa yaNdangwa Paavo Amwele okwa ti ekangha lovanailonga vomelelo laNdangwa okwa li ta li shu nifa omayakulo oshiwana pedu eshi meembelewa kwa li muhe na vali ovanailonga.
Okwa ti eshi osha li eshongo linene kovakalimo vomOndangwa shaashi ka kwa li hava mono vali omayakulo ngeenge ve uya keembelewa.
Amwele okwa weda po ta ti oshiwana okwa li hashi kala shangudumana pondje yombelewa sha hala okukwafelelwa ngaashi okufuta omeva nosho tuu omayakulo a mwepo a yooloka ashike meembelewa iha mu kala muna ovanhu