Ovalongifi vokatoo paife otava li nedina lodolongo
Festus Hamalwa
Kakukutu komatanga koshikondo shomavyulonghalo needolongo Commissioner General Raphael Hamunyela okwa ti ovanhu vahapu ova ninga oihakanwa yokutulwa mokatoo eshi hava kala tava tumu oimaliwa kovanambelewa voipupulu kutya otava yandje oilonga koshiwana.
Hamunyela okwa ti ombelewa yaye oya kala nokumona omanyenyeto mahapu okudilila moshiwana, vati tashi shangelelwa oshimaliwa shavo sha tumina ovanhu tava ti kutya otava yandje oilonga kovanhu va ka longe moshikondo shomavyulonghalo.
OmudowadjakomuSepetemba oshikondo shomavyunghalo osha li sha pitifa omukanda pambelewa kutya otashi kutu ovanhu va ka longele komavyulonghalo onghee ovanhu vahapu ova ninga omaindilo oilonga ei.
Naashi osha eta opo ovanhu va kale tava dengele ovo va ninga omaindilo ile ovapambele vavo nokutuma omatumwalaka kutya nava tume oshimaliwa shonhumba opo va pewa oilonga.
Edi Hamunyela okwe di popya Etivali eshi a lombwela Kundana ta ti ombelewa yaye ina i yandja epitikilo komunambelewa keshe a longele oshikondo shomavyunghalo opo a kale ta kelele oshiwana.
Onghee ngeenge opena ou te shingi ota ka tukilwa onghatu yopaveta shaashi ou oulingilingi.
“Oshikondo shomavyulonghalo iha shi landifa oilonga. Oilonga oha i yandjwa ashike ngeenge omunhu a udifa ngaashi naana ha shi ningwa koikondo ya yooloka,” Hamunyela ta ti.
Okwa kumaida oshiwana opo shi kale sha kotokela okatoo opo shi ha ninge oihakanwa yokukanifa omaliko avo.
“Ovanhu nava xulife po oku ya meenghundafana novanhu tava longifa okatoo. Oshiwana nashi kale tashi kwatafana nombelewa yetu ngeenge shina eshi sha hala okupula opo shi kale sha mona ouyelele womondjila,” ta ti.
Okwa weda po ta ti omadina ovanhu ovo tava ka ndja mo okupewa oilonga otaa kala a yandjwa moshiwana momafiku 13 omwedi ou.