Oosikola anuwa otadhi pata ashike ngele onkalo ya nayipala
Uuministeli welongo owa ti oosikola otadhi ka pata owala ngele efundja olya pimbile poosikola. Mongashingeyi aanona oyendji oya tameka nale taya ende miishana yu udha omeya, naakuluntu yelongo miitopolwa oya ti otaya ka indila epitikilo kombelewa onene yelongo, opo oosikola dhimwepo dhi patwe omanga omeya taga loto. Omugandji gomauyelele nomupopiliko muuministeli welongo Sem Shino, ongula yEtiyali okwa ti sigo oompaka inaya lopotelwa oosikola dha pata komeya gefundja. “Sho kwa li nda popi nomukuluntu gwelongo moshitopolwa shaHangwena Isak Hamatwi, okwa ti, ngele onkalo ya nayipala opo taya indile epitikilo koombelewa oonene dhelongo opo oosikola dhi patwe pakathimbo,’’ ta ti ngaaka. Kansela gwoshikandjohogololo shEngela Elkan Hainghumbi okwa totha mo oosikola ndhoka dha dhingolokwa nodha tetwa oondjila komeya gefundja moshitopolwa shaHangwena ngaashi, Shingunguma, Onyofi Primary oshowo Ndiilokelwa Combined. “Omeya otaga endelele gu uka komeho, onkene oshigwana otashi kumagidhwa kaashi ende momeya ngoka taga tondoka noonkondo, osha nika oshiponga,” ta kumagidha ngaaka. Aavali oshowo aalongi poosikola dhimwe ndhoka dha dhingolokwa komeya moshitopolwa shaHangwena otaya nyenyeta aanona ya tula oomwenyo dhawo moshiponga sho taya taaguluka iishana yu udha omeya. Omulongisikola posikola Onghala Combined, Martha Ekandjo okwa ti oye na uutile waanona yawo taya taaguluka omeya ge thike mpoka, ya tsa mo moshiya omanga yamwe ya tsa mo poonkwapa. “Iishana mbyoka yu udha omeya oyo ya kala oondjila dhaanona okuya koosikola. Momeya moka natango omu na omayoka niilikama yilwe yi li, onkene otatu pula ekwatho kepangelo lyi tu yambididhe omanga kuyele,’” ta ti ngaaka. Ta ti, ondjila ndjoka hayi piti iihauto oyi li poku yogwa po, oshoka omeya oga londa nale kombinga yimwe. Omunambelewa omukuluntu gwiikwameya muministeli wuunamapya omeya niikwamavi Leonard Hango okwa ti, omeya otaga matuka noonkondo shoka tashi ulike kutya omvula otayi loko noonkondo koshishiindalongo koAngola. “Otatu indile ehangano hali longo noondjila Road Authority (RA) opo lyi idhope mo muupyakadhi mbuka wa taalela oosikola. Otwa pumbwa okuyambidhidha paife, inatu tega ku toke,” ta kumagidha ngaaka. Hango okwa gwedha po kutya ndika etameko, onkene uupyakadhi opo tau landula ko, noshihwepo ngele oshigwana tashi ilongekidha omanga ku na ethimbo okuyanda uupyakadhi hau holoka pethimbo lyefundja. Ngoloneya gwoshitopolwa shaHangwena Walde Ndevashiya okwa ti, ombelewa ye oya kala nokukondolola onkalo nkene efundja lya ponokele moshitopolwa, opo ya vule oku yambidhidha mboka ya ningwa iihakanwa. Omunamukunda gumwe moshikandjohogololo Engela Saima Ndilula okwa ti, oku na uutile womeya ga ye sigo omepya lyawo niilya yawo yi halakanithwe po komeya. Shoka otashi ulike kutya aanamapaya nuumvo moshitopolwa shaHangwena ope na ompito yokwaakala inaaya likola mo oshiyamba momapya.