Ovambanderu nga ve sekamene ovyao nu nga ve rire epango
Ovambanderu nga ve sekamene ovyao nu nga ve rire epango, tji va zunḓasana ngave isirasane ave umbasana omawe no ku hembasana.
“Omuvero wo tjiwaṋa tjoVambanderu uri kamwaha. Tji u nokoṋa ku wa karya, pa sana ko zo ngombe nḓu maze piti mo tjunda tjimwe aihe ai karya mo kuti munda ku mai karya posiya tji maze kotoka ponganda orumbo i rumwe uriri,” Ombara yo Muhoko Eben Tjozohongo II Nguvauva matja. Otjomuhungire wo ngurova po ma zemburukiro oyetja 15 wo ndiro yaihe, Ombara Munjuku II Nguvaua Omandaha mOtjomuise. Omuyaruke Munjuku II wata tjiyari 16 ku Rozondu mo 2008.
Tjozohongo II matja ngwa karya ka karya tja kotoka ma kotoka po nganda no kuhina epuriro no mbanguriro. “Ngatu isirasane atu hembasana okaṋa ku me tono ko’hamara tjinene. Ngatu ise ozoWhatsapp zo ku hembasana, ingwi wa ire pi wa tjitire vi.”
Matja Ovambanderu nga ve kuramene ovyao, no kuhina otjiwaṋa kaku no nganda ya Nguvauva, nga tu rire epango. Mitanda sekamenee oviungura vyetu, oo Tate noo Mama va rire ovanene zo nḓiṱona ngatu sekamene ovyetu. “Oumbanderu owetu atuhe kawo kutja Tate ngunda ope ri orondu muhuka otjiungura tjo matjiso kukapurwa kove ponganda tjiwa sewa ponganda tjimuna tji mba kambura otjiwaṋa tjetu tja Nguvauva,” Ombara matja.
“Ngatu kambure oviungura mbi tu tware komurungu, ngatu kotoke moviṱo vyoo Tate noo Mama veetu arikana vahona vandje. Ngatu yarurwe nohange. Ongamburiro ngai honapare mweṋe,
ondengero, orusuvero nomaunguriro wa kumwe ngavi munike mokati kotjiwaṋa,” me ri yarikana nao.
Ovahungire varwe po ngurova yo mbura posya ndjihina ya tjeyerere omuhoko kotjavyo, yari Orata Onene Ripuree Tjozongoro, Orata Kavazewa Mootu
no Nongo Rukee Tjingaete mbatarere mo viungura no hambwarakana yo Mbara Munjuku II mo tjiwana na mo porotika yo ngutukiro yehi. Oyo wina ndjari no vi tjitwa vyombazu vyo nderera, ozombimbi no zondoro.