Uukongo woompanda kaau li paveta moNamibia wa londo inaashi monika nale
Omuyalu gwoompanda tadhi dhipagwa kaashi li paveta moNamibia ovula yazi ko ogwa londo shi vulithe pomimvo adhihe dha zi ko.
Aanambelewa oya ti oompanda dhoka dhili iiyamakuti ya gamwenwa, odha li dha dhipagwa kaashi li paveta dhili 87 omumvo gwazi ko, oku yelekanitha noompanda 45 dhoka dha li dha dhipagwa momumvo2021.
Odhindji dhomoompanda ndhoka odha li dha dhipagelwa moshikunino shiinamwenyo mEtosha.
Omuyalu dhoompanda moAfrica odha shuna pevi noonkondo muule woomvula ooshona dha zi ko, omolwa omayego gadho ngoka taga tapwa mo menenemvi ga falwe koChina nokoVietnam hoka ku na aalongithi yago oyendji.
Aafuthi oya dhipanga oompanda oonduudhe dhili 61me Etosha, moka ya dhipaga wo ndhoka oontokele, dhi li 46 Omupopiliko wuuministeli womindhingonoko niikwakuti Romeo Muyunda osho a lombwele iikundaneki.
“Otwa koneke oshinima shika neikwato pomutima. Oshikunino shetu shiinamwenyo shEtosha shoka shili osho ndhingi moshilongo osha ningi ondambo yookalyamupombo yiiyamakuti,” Muyunda ta ti.
Aafuthi yamwe haya zi nokuli kondje yiilongo ngashingeyi oye ya po nuutekenika uupe woku nonoma iiyamakuti noku yi kwata e taya tete ko ooniga nenge omayego, e taye yi thigi mpoka yili muuyehame, sigo otayi si.
Uukongo wiiyamakuti kaagu li paveta moSouth Africa nomoBotswana owa eta opo epangelo li tameke oku teta ko ooniga nomayego kiinamwenyo opo yi kale nomwenyo.
Uule woomvula odhindji, omapipi nomapipi gAachina oga kala taka longitha omayego goompanda ngoka pamuthigululwakalo gwawo haya ti oge na oonkondo dhoku aludha.
Oku ulika kwomayego goompanda hoka opo kwa tameke moVietnam nako wo okwa geyitha edhipago lyoompanda moAfrica.
Koshilongo hoka aantu ohaya kala ya yaneka ta ulike omayego goompanda anuwa shaashi oshi holola kutya ngoye omuyamba ngele wu na omayego goompanda ya tulikwa megumbo lyoye.
Oshinamenyo shoka sha gamenwa noonkondo ompanda onduudhe oshoka mongashingeyi kombanda yevi odhili ko owala o5000 ndhi na omwenyo. Ashike uukongo woondjamba kaawu li paveta moNamibia wo owa shuna pevi oku za poondjamba 101 mo2015 oku ya poondjamba ne omumvo wazi ko.