ǂKhoa-i ge !gamhe tsî ǁgûga ūǁnâsa

Zambezi ǀkharib di ǀawa!namn ge !nurisa ǁhōb hîa mā-ams ose hâ !aus ǁkhaubasa !aubǀgurun dis tsî ǂkhoan ǁgûgu di !naris diba ra ôa!gao. Nē !nae!khaisa ge ǂhai kai !khais ge, ǀōhâ soros !gamsa ǂkhoa-i dis ge ǁgûga ūhâ tamase a hōhes khao!gâsa.

ǂGom!gâhe rasa !oan ge tarin a !khaisa noxopa ǂanǂuihe tama khoena mā-ams ose ǂkhoa-e !au, !gam tsî ǁgûga ge ūǁnâ. Nē !nae!khais ge ǀawa!namn ra !nurisa !oa 16 tsî 22 !Hoaǂkhaib nē da hâ!nâ kurib dis ǁaegu Dzudzos di ǂgarib !â!âb hîa Dzotis !aub !ûi!gâs Zambezi ǀkharib dis !nâ ra ǁnās tawa ge ī.

“ǂKhōn ǀguin xa ǁaupexa !khōgarahe hâ ǂkhoa-i soros ge ai!â gere ǂoa wekheb di Fraitaxs ai ge hōhe tsî soros mâsib gere ǁgausa !oa ǀnai ǁaupexa ǀgam wekhekha !kharu hâse a !gamsa.

Nē !gamǂuihe ge ǂkhoa-i di ǁkhāsib ge ǀnōǀnōhe rasa !oa N$29 000 ai hâ,” tin ge Zambezib ǀawa!namn hîa nē ǁhōb ôa!nâs !ereamsa tani hâna !nuri tsî ge mî, ǁhōb ôa!nâs noxopa ǁnā tsūdī-aona !khōsis !nâūs ǂnamipe ra ai!gûsa, noxopa-i ǀgui khoe-i tsîna !khōsis !nâ ūhe tamase.

ǀNî hâ ǀkhara ǁhō-i hîa !aubǀgurun !gamǂuis ǀkha !gaeǁaresa ūhâ tama hâ i !nân ge Zambezi ǀkharib di ǀawa!namna omkhôaǂgâ-i ge ǂoa Fraitaxkam ǁgoa!aroma, ǁaupexa 03h00 hâ i-e ra ôa!gao.

Nē khôaǂgâs ge !naris ai ge hâ i tsî om!nāb di xūn hîa ǀhaehe rasa !oa N$16 238 ǁkhāsiba !khōǂgā hâna ge !narihe.

“ǂÂisāhe rasa !oa-i ge nē khôaǂgâ-ao-e, ǂûsâi!nâ!nāoms di mûǂuidaosa ge khôa, oms !nâ ǂgâs īǁkhāsiba hōbasens ase. Oms di ǀhonkhoen ge ǀkhai i tamas ka i o ǁomǁgoe i !khais di !gāsasib ge hōsa tama ge hâ i.

Nē !nari-ao-i ge !gâi!gâ tsî kai!gâ ai-īsiǂhôaǂgares tsî aniǁgann tsîna ge ūbasen hîa ǁkhāsib âna ǀhaob ai N$16 238 ai ra !gôa!gôahese.

Nē xūna noxopa hōoahe tama i tamas ka i o !nari-ao-e !khōsa tama i ti i ge hâ, xawen ge ǀadi kha noxopa ra ai!gû.