Otweyas omdi di ǀhonkhoesis ge ra ôa!nâhe
!GOMENǁGAMS - ǀNî ǁanǂgāsaben Otweyas din hîa kai!gâ ǂhuwib ge 174 khoena a hâ!khai kais khao!gâ ǀasa omde a māhen ge !aorosasib nē omden a ǂoa!nâ ǁkhāb !nâ hâ. ǂHanu tama sîsenǀgaugu ge ge hō!âhe nē omdi !aroma xoamâisens tsî ǀgoraǂuis di ǁaeb !nâ, ǁnāpan ǀnî khoen hîa ǂhunumase nē omde nî !khō!oase ge īna ge !gâi!gâ tama i, tsîn xoakhâib ai ge mā tama hâ i khoen ǀnîna omde ge !khō!oase. Erongob di ǀkharisimûǂamaob, Neville Andreb ge nē ǀasa !nae!khaide New Erab ǂhôare-ao-i ǀkhab ge ǂoa ge wekheb di Denstaxs ai ūhâ i dî!nâǁgamǁare-i !nâ ge ǂan!gâ. “Ama i ge, sida ge sîǂkhanide nē mâsib xa ra tsâǀkhāhe khoen ǁga ge sîǂui î da ǁîn ǀkha ǀhao tsî ǀhûǁarebese oresa hōba nē !gomsiba. Nēs ǀguisa ta ge nēsi a mîba du ǁkhā, nē ǁhōb a sausa tsî da hoa ǀkhāgu nî ǂkhî-ū oresa ra ôa amaga,” tib ge ge mî. ǂGuro ǂnûs ge ǂoa ge wekheb Wunstaxs ai ge hâ i. Nēpa xu ge ǂoaxas ge ǀnî khoen ge ǀaokhoen xa nē xoakhâib ai gere ǀarohe tsî nauna maride mātare tsî gere xoaǀarohesa. ǀNîn ge ǀnai bleomdi âna ǀnî khoen ai māǂui tsî xawe ǀnai !āsa xu ge doebē hâ i nē ǂhuwib ge hâ ǁaeb ai. 2021ǁî kurib !nâb ge ǂhanuba N$45 miljun marisa ge mā, 197 omdi nî !Gomenǁgams !nâ ǁnān hîa ǂhuwib xa ge a !aromahese a omon !aroma omhese. ǂHuwib nēb ge 174 khoena ge tsâǀkhā, ǁîna xun 43 khoena Shack Dwellers Federations Namibiab dis (SDFN) ǁanin ase ge ǂanǂuihese. ǀHōǂgaeb 2021ǁî kurib dib !nâ, ǂhanusise di nē omde nî ǁkhaeǁnâhes ai!âb ge !Gomenǁgams !Garo!ā ǁHûi!nâǂharis ǀawemā-aob, Donatus Tegakoba ge mî, ǁnāpan nē omde ǀgoraǂgās !nâ ǀguitikō-o!nâsina ge hâ isa tsî ǁkhā soab ai gere ǂan ǂgao, mâtis ǁgaumâisa komitesa !nāsa mî-am!nâ-e ǀawemā-aob tsî ǀkharisimûǂamaob xa ge ūhâ isa. Otweyas di !hū!âdi ge 300 xu 370 kaisiba !khōǂgā hâ. Nē omdi ge ǀgui ǁgoe!nâ!nā-oms, ǂkhari-oms tsî ǁāsen!nâ!khaib ǀkha hâ tsî hāǀaro rase mātare-e ra ǁgam-i tsîna ūhâ. Mâ oms hoas ge ǀnai a mā-amsatoa omkuruǀgaub ǂgaekhâib hîa hāǀaro ra ǀgam !nā-omra !khōǂgā hâb tsîna ūhâ. !Gâi tama mâsin ge nē omdi ǁkhaeǁnâs !nâ ge hâ, ǀnî khoen hîa ǂhunumase ga omde hō hân ge a ǂoa!nâse. ǀOrodomman ge 25 khoen hîa ga omde hō tama hâna ge !gâi!gâ tsî 17 khoen hîa ǂhuwib xa ge ǂkhôahe tsî nē omde nî hōse ge ī ina ge ǂoa!nâ. Projeks nēs di mûǂamaob, Raymond Pietersoni hîa ministeris sîsengu disa ra ǂnûǁkhaebab ge ge mî, nēb a sausa ǁhō, xawen hoa !gôasib ǀkha nēsa ra sîsenǂam tsî oresa nî hā-ūsa.