Oshakati otai ulike oipindi neudo
MAYOLA wodoolopa yaShakati Leonard Hango okwa tonga kutya omauliko opaipindi aShakati oku na okuningwa neudo muDesemba. Okwa weda po yoo kutya odoolopa oya ninga eedula nhatu inai ninga omauliko opaipindi molwoCorona Virus. Eshi okwe shipopya pefimbo a li ta yandje omutengenekwafaneko wodoolopa yaShakati Etivali. Hango okwa popya kutya natango eve na edilaadilo lokutunga okapale kakula komaudano a yooloka mOshakati, opo ovakwashiwana va kale tava kufa ombinga momaudano a tya ngaha. Okwa weda po yoo kutya eshi otashi ka ningwa pamwe neenhele domalihafifo aakulunhu nounona, oda tengenekwa di ka tunge kEkuku oshoyo kOnawa. “Eshi ohatu shi ningi shaashi odoolopa otai ningi yakula yoo otai xumu komesho”, Hango ta tumbula.
Hango okwa popya yoo omalunduluko oo ve na ediladilo lokueta modoolopa ngaashi okutunga omikangha dokutondoka omeva onyata mEvululuko. Okwa tonga yoo kutya ova hala okulonga opate oyo i li pamwe nomatala aKatana oshoyo omatala oovene. Ova hala yoo okulonga olukanda laShoopala li kale tali monika nawa. Nonande pe na ondungefaneko nedilaadilo lokuweda omalunduluko nexumokomesho mOshakati, natango elelodoolopa laShakati ola kala le lipyakidila nokulonga la tula ombuda moshixwa, omo eepoloyeka dihapu da pwa nale nokuli. Hango okwa weda po kutya okuudite etumba lakula mokutumbula kutya odoolopa oi na oinima ihapu ya fikama ya pwa okulonga. Okwa tonga kutya oshitaasi shakadimamundilo osha pwa okutunga nosha fikama. Okwa weda po yoo kutya ova kendabala okutunga omaumbo a konda po49, a nuninwa ovanhu ava hava di kOshoopola.
Okwa popya yoo kutya elelodoolopa oli li tali wapaleke eenhele dihapu mOshakati, ngaashi Extension 10, 11, 13, 15 oshoyo ombinga imwe yaUupindi. Ova ninga yoo onghendabala natango yokulonga eenhele domaendo oshoyo eepate odo di na omalambo. Ova ninga yoo ondungedilaadilo opo va dule okuwapaleka etoto loimbodi. “Otwa ninga onghendabala yokutunga onhele omo hatu kala hatu idilile eengobe daavo tava kayula onyanga pamukalo wokulifa modoolopa,” Hango ta weda po.
Hango okwa weda po kutya omutengenekwafaneko aushe wo2023/2024 owa fikama poimaliwa eemiliona N$214.