Ooveta dha kulupa odha pumbwa okutalululwa - Ithete
SWAKOPMUND– Omunashipundi gwokangundumutima kegumbo lyopashiwana ke lile po eliko Natangwe Ithete okwa pula opo ooveta dhi talululwe opo dhi vule okwoopalela ethimbo lyongashiingeyi.
Pethimbo a li ta popi momutumba gwoshigongiilonga gwontontwaveta yoFinancial Institutions and Markets Act (FIMA) ngoka gwa li koSwakopmund, Ithete okwa ti inashi puka okupingenapo ooveta ndhoka itaadhi opalele we onkalo yanakanena. Mokati kooveta ndhoka, Ithete okwa ulike mo okatendo ko-FIMA ke na sha nokukaleka po oshimaliwa shopenzela, hoka taka thiminike opo aantu ya pungule, nenge kaaya longithe opelesenda 75 dhoshimaliwa shawo sigo otaya gwanitha oomvula 55, shoka sha eta engungutulo moshigwana.
FIMA ngoka a totwa po momumvo 2021, okwa etwa po nelalakano okupingenapo oveta nokatendo kopenzela ka tseyika nawa onga Pension Fund Act of 1956, noshowo okuhanganitha nokulongitha meukililo ooveta dhiiputudhilo kaayi shi yopambaanga. “Otwi iyadha twa kuutumba nokatendo kopenzela hoka ka li ka nyolwa mo1956, okatendo hoka twa dhimbulula kutya itaka opalele we onkalo yopaife yeliko, sho osho twe ya po nokatendo hoka ko-FIMA.
Ashike sha landula komakemo goshigwana omolwepungulo lyopenzela otwa tokola okuninga omitumba nganguka tatu ningi nena mErongo,” Ithete ta ti.
Oshigongiilonga shika osha li sha eta pamwe aakuthimbinga ya za kiikondo nokomahangano ngaashi koNamibia Financial Institutions Supervisory Authority (Namfisa), uuministeli wemona noshowo omahangano haga ungaunga noopenzela.
Omutumba nguka otagu gandja wo ompito kiilyo yomutumba gwopashigwana nakehe ngoka e na mo sha moshinima shoka shopenzela opo ya gandje omaiyuvo gawo kombinga yo-FIMA nuutendo wayo. Aakuthimbinga otaya ka tegelelwa opo ya tothe mo uuwinayi noshowo omashongo ngoka ga kwatakathitwa ko-FIMA.
Otaya ka pulwa wo opo ya yambidhidhe meyepo lyomilandu ndhoka tadhi ka lalakanena ekalekopo lyoshimaliwa lyi li nawa ndyoka tali ka kala lyi li muuwanawa woonakumona oshimaliwa shoka,” Ithete ta ti. Ithete okwa ti oshizemo shoshigongiilonga shoka shomasiku gatatu otashi ka ulika okakomitiye momutumba gwopashigwana kutya ondjila yini yi na okulandulwa ngele tashi ya ko-FIMA. –Nampa