NIPDB a xungila novanyasha vehe na oilonga
ONGWEDIVAEhangano ledina Namibia Investment Promotion and Development Board (NIPDB) olo li li koshi yombelewa yomupresidente oshivike sha dja ko ola ongela ovanyasha vehe na oilonga opo va xungile pamwe vo va paafane omayele.
Oxungi ei oya li ya nuninwa okutala komhumbwe yoilonga mokati kovanyasha, voo va dule okutofa mo eemhito doilonga odo di li po. Oxungi oya popya lela oinima ihapu omo mwa kwatelwa nghee ve na okutungafana opo va yambule po eliko loshilongo va dule okukufa ombinga mokueta po eemhito doilonga moNamibia.
Omunambelewapitifi wo- NIPDB Nangula Uaandja, okwa yandja ounoungo kombinga yeliko loshilongo, osho yo omikalo dokueta po eemhito doilonga ngaashi okutota po eengeshefa odo tadi dulu okuyandja oilonga kovanyasha nokukuta yoo vakwao. “Ondi udite unene etumba linene eshi omwaalu wovanhu vahapu wa kufa ombinga, vamwe nokuli otava pwilikine pamalungula,” Uaandja ta tumbula.
Uaandja okwa kunghilila yoo ovanyasha ve ke lihonge koiputudilo yopombada ngaashi koiputudilo yopaungoba, tave ke lihongela oinima ei tai eta po eemhito doilonga ngaashi Green Hydrogen oshoyo oikwamina nomahooli. Okwa weda po yoo kutya omunhu e na ounongo woikwanghono yoGreen Hydrogen oshoyo moikwamina nomahooli ota dulu okukala e na ongeshefa hai yandje omakwafo a pamba oinima ei. “Kongeni oinima ei i na oshilonga meenghalamwenyo deni, ndele tamu tameke okulonga nayo opo i dule oku mu twala komesho,” Uaandja ta ti.
Ovanyasha ove li va talika komahangano a yooloka nokwakula moshiwana oo taa dulu okuyambula po eliko loshilongo, onghee oxungi yoludi eli otai dulu lela okweeta elunduluko ngee tashi ya keliko loshilongo. Oxungi yoludi eli otai pula komesho opo puha kale nande omunhu e na omadiladilo a fiwa koninma inaa tulwa nande omoilonga.