Muinjangue: Omafimbo kaakiintu oshinima shopashito

ONGWEDIVA - Uuministeli wuuhaku nonkalonawa opamwe nuuministeli welongo oshiwike sha zi ko owa dhimbulukwa esiku lyomathimbo gaakiintu.

Esiku ndyoka olya li tali tyapulwa lwoshikando oshitihamano moNamibia nolya dhanwa kohi yoshipalonyolo ‘Muukumwe otatu ka tambula ko omathimbo ongoshitopolwa shonkalamwenyo komumvo 2030’.

Omupeviminista gwuuhaku Ester Muinjague, okwa ti omathimbo oshitopolwa shopashito, shoka inaashi pumbwa owala okusilwa oshimpwiyu pauyogoki, ihe oshitopolwa wo shuuthemba womuntu nekalekopo lyongushu yuuntu.

“Omathimbo nkene twa kala oga kala oshingambeki shoka sha kala nokuwiimba aanona yaakadhona opo ya ye komeho monkalamweyo. Opu na uuyelele wa gwana mboka tawu ulike kutya omathimbo inaaga silwa oshimpiyu ohaga eta okwaathika pamwe, ohaga eta wo opo aakiintu ya landithe po omalutu gawo opo ya mone oshimaliwa shokulanda uututa womathimbo, okweeta opo uunona wuukadhona kaawu ilonge nawa mosikola, nosho wo onkalo yuukolele pakuudha,” Muinjangue ta ti

Omupeviminista ta holola kutya aanona yaakadhona ohaya kala inaaya ya kosikola omasiku ga thika pugatano omwedhi kehe, omolwomathimbo. Shika ohashi eta opo aanona oyendji yaakadhona kaaya ye nawa komeho monkalamwenyo, okuyelekanitha naalumentu.

“Oshinakugwanithwa shetu ongepangelo okusa oshimpwiyu kutya oshinima shomathimbo oshi uvitike ko nawa moosikola opo aanona yaakadhona ya ye komeho ngaashi naanaa aamati,” Muinjangue ta ti.

Oshiindingili shika osha dhanenwa koshitopolwa shaHangwena hoka osikola yo-P.H. Muandingi Junior Secondary School ya li ya pewa uututa ongomagano.

Efano: Max Henrich E ku pe kashona… Omupeviminista Ester Muinjangue ta gandja omagano guututa.