South Africa ita ka thula uusimba wakakoko
Presidente gwaSouth Africa Cyril Ramaphosa okwa ti itaya ka thiminikwa nando okulundulula onkatu yawo kutya yo oya manguluka na itaya ka agemena nando okoshilongo oshikwawo momatokolo gopaigwana. Ta popi poshiindingili shetyapulo lyesiku lyAfrica mEtine moKrugersdorp muuninginino waJohannesburg, Ramaphosa okwa ti enenevi Africa olundji ohali thindilwa kongudhi lyi kuthe ombinga miikolokosha yaa shi yawo noyi li komakule. “South Africa kape na esiku a ka nanenwe miikolokosha yaanankondo muuyuni. Otatu ka kale ka po etokolo lyetu, kutya tse otwa itaala mokupotokonona iikokolokosha pambili kehe tuu mpoka tayi holoka muuyuni,” Presidente Ramaphosa ta ti ngaaka. Ekwatathano lyaSouth Africa na-US, oshilongoshokashasimanamomapingakanitho giipindi, olya nayipala sho South Africa a kutha etokolo lyokwaagama ombinga miikolokosha pokati kaRussia naUkraine. Shika osha li ishewe sha hwahwamekwa komapopyo ga ningwa komukaleliposhilongo gwa-US moSouth Africa, Reuben Brigety, kutya South Africa okwa landitha iilwitho kuRussia. Presidente Ramaphosa okwa zimine okukonakonitha omapopyo ngoka, ashike okwa ti kape na uumbangi wa kola. Moshipopiwa she shomEtine, presidente okwa ti iilongo oyindji, mwa kwatelwa South Africa, otayi ningilwa omambandameko sho tayi ikaleke kokule nokugama ombinga. Ashike ina fatula kutya omambandameko ngoka oga hala oku tya naanaa ngiini kondandalunde. Ramaphosa ta ti enenevi Africa natango ohali dhimbulukwa iita ya hingilwa kiilongo iinankondo, ashike kali na mo sha miita mbyoka paushili. Epangelo lyaSouth Africa olyi na wo okuninga etokolo enene kombinga yaPresidente Vladimir Putin gwaRussia, ngoka kwa tegelelwa a ka talele po South Africa omvula ndjika. Ompangu yopaigwana yoInternational Criminal Court (ICC) oya gandja epitikilo a mangwe po shi na sha nekwatathano lyiita pokati kaRussia naUkraine.