Tja tjitwa tja yenene, ozondekurona za zemburuka 28 Kambundu otjEyuva rOtjiṱiro Otjindjandja

“Korui ku pi, konganda ku pi?” omuhungire weyuva okaṋepo okakuru kOswanu ya Namibia mOmbongarero yOtjiwaṋa, Usutuaije Maamberua, ma pura nao, ama hungirire kokutja tjii hapo oruyano rwapamwe pokati kohoromende ya Namibia noyehi rOvandoitji, wina ndji tjiukwa otjOjoint Declaration, ousipi OJD, ya unda pi.

Maamberua wa ri omuhungire weyuva pomazemburukiro omatenga i yozondekurona ozeni wEyuva rOmazemburukiro wOtjiṱiro Otjindjandja Osondaha mOtjomuise. Ozondekurona za zemburukire 28 ku Kambundu nganduu komazemburukiro waro kotjiveta i yohoromende Otjeyuva rOtjiwa¿a Romazemburukiro wOtjiÞiro Otjindjandja.

“Korui ku pi, konganda ku pi? wina ra kete tjinene okuza kom- azemburukiro wa Sondaha tjinga nambano ozondekurona novazapamwe na ihi otjiwaṋa atjihe tja Namibia novaṱatjari mouye atji nozonḓuma zokutjiwa kutja nambano hapo ohoromende mai tjiti vi? Ya ri ongahukiro kutja ozondekurona za kurama otjotjiku tja Tjaveva kongotwe yomayuva inga.

Owo nga yakurwa i yOmbongarero yOtjiwaṋa kehi yombepo ya Maamberua mo-2016. Kutja tji tja sewa po uriri nai ohoromende okuzeuparisa omayuva nga.

Kazondekurona porwazo nungwari ovanaruyameto pekepeke va yandjere oruyameto komazemburukiro weyuva ndi momayuva ingo nga kekwa tji ya ri 29 ku Kambundu.

Mu wo mu mu na ngwa ri okaṋepo kOmbongarero yOtjiwaṋa kOswapo ya Namibia, Anton von Wietersheim, eye wina ngu ri ondekurona yOvandoitji.

“Eṱe atuhe, otjovazapamwe Ovavapa ovahungire vOtjindoitji poo rarwe - oruveze orure rwohuurire rwomakuruhungi yetu pamwe na eṋe nombangu yotjivara mbu twa vyarere, nu kovazapamwe mbaave hendekwa tjinene tji tja ri otjiihamise notjihina ouwe komutima, twa sokupeta oviuru vyetu nomerisusuparisiro nohoṋi nondengero … amatu itavere nohoṋi komuihamo weṋu … natu yarisa ondengero yetu komuano eṋe mbu mwa roporora eke rondjesirasaneno, amamu rihekenene ku eṱe okurikwamba ku eṋe nokumupa oruyameto mokupaha pamwe omaandero kombameno yorukapitaveze momazuvasaneno youumwe,” von Wietersheim ma tja nao.