Ondekurona ya vasisa eraka kokure hembandina
Michael Uerikua, ondekurona yOtjiṱiro Otjindjandja wa rire umwe wozondekurona okutjita omakuruhungi mongondjero yOtjiṱiro Otjindjandja okuzuvisa eraka re mu rumwe rwotutu twOmihoko Omikutasane.
Uerikua ngu ri Operesindenda yOkehi yOtjisuta Otjetu Oveni, mozondambo za Jefta Nguherimo zOtjihuro ohongora tja Switzerland, Ongeneva, ngwa raisa korutu rOmihoko Omikutasane ndu tunduuza ozonḓero zamba ziriire mOafrika, indwi Permanent Forum for People of African Descent. Otjivike hi momutima womberoo yOmihoko Omikutasane motjihuro Onew York mOmahi Omakutasane wa Amerika, otja twire po ondjuriro yOvaherero nOvambanderu, ama ningire orutu tjingerwo kutja ru twe po omazeva woveta womasembamisiro wOtjimbumba tjOtjiungura tjOtjisuta na wina wOmbwiko yOtjisuta tjOtjiṱiro Otjindjandja. Wina ama tja ndoondoo kOmihoko Omikutasane, me vi ningirire okuhakaena novanarupa avehe nozohoromende okutuurungira mozonongo zavyo zapeke okukongorera ondjira ndji ri yo yovihape ovikovise.
Munda imbwi owe ombura ndja zu ko mu Tjikukutu, Nguherimo wa ningira orutu ndwi okusembamisa omirari vyopondondo youye vyOtjisuta okuvatera poo okutumbura otjiungura tjokukondja kutja pe kare oukohoke momapahero wotjisuta.
Ozongondjero zozondekurona nḓa azeembari otjiraisiro tjokutja nambano ozondekurona omeho za hwiririke mOmihoko Omikutasane. Otja tji mape tjiukwa nai katjisupi ovatjiwe vapeke vorutu rwOtjirata tjOmihoko Omikutasane tjOmausemba wOundu, matji undju ozohoromende ooya Namibia noyEhi rOvandoitji okuzirira komuano mbu ya ungura motjihungiriro tjOtjiṱiro Otjindjandja ozo nḓu za isa po otjazo kourike wazo ozeni nokupatera imba oveni vatjo pendje, mbe ri ozondekurona zOvambanderu, Ovaherero nOvakwena.
Uerikua nai u turira mouye wopendje mehi Ochech Republic mEkoverwahi ra Europa