Fye ihatu kakama oumbada - Museveni
Omupresidente waUgandan Yoweri Museveni okwa lombwela ounyuni ombaxu nokavava shi na sha noveta oyo ya shainwa kopaliamente moUganda kuyele oshivike eshi, i li omhinge noushenge.
Museveni okwa ti kave na efiku va lundulule oveta oyo va shaina, nonande pe na vahapu tava pula opo oveta oyo i tendwe mo meeveta domoshilongo.
"Eshi twa shaina oveta oyo otwa mana, no kape na ou ta ka lundulula omadiladilo etu. Ngee twa fiile omate pedu otwa mana, katu na efiku tu a shune mo mokanya. Otwe lilongekidila oita,” osho a shanga moshinyolwa eshi a pitifa konima yeenghundafana a ninga noilyo yongudu yaye yoNational Resistance Movement (NRM).
"NRM nghee a kala ke na omalaka avali. Elaka eli hatu ku lombwele ongula, olo ngoo vali hatu ke kupa konguloshi, ihatu lundulula,” ta weda po.
Edi okwe di popya sha landula omapopyo eyembo oo taa ningilwa komahangano e lile po oufemba womunhu, oshoyo oilongo yokouninginino.
Omupresidente wa-US Joe Biden okwa yemba oveta oyo ta ti oi li enyonauno loufemba womunhu, ta ti ngeenge inai kufwa po, US otaka tulila po Uganda eendjidikila.
Omukulunhu wehangano loukumwe waEurope (European Union) nosho yo oiwanahangano Antonio Guterres naye okwa yemba oveta oyo.
Eshaino loveta oyo ola li la ningwa konima eshi opaliamente ya li tete ye yi talulula - ashike nande ongaho, natango oyo imwe yomeeveta odo da nyaa komunhu di li omhinge noushenge mounyuni aushe. Keshe oo ta ka monika ondjo mekwatafano noushenge moshilongo osho okwa taalela ehandu longhalamwenyo modolongo.
Oveta oyo oya kwatela mo yoo ehandu ledipao kwaao ta ka monika ei tauluka unene, nomanyono oo a talika ko manene okwa kwatela mo okuya moixulo nounona ve li koshi yomido18, ile ngeenge oixulo yoludi olo oya etele omunhu omukifi uhe na epango ngaashi o-HIV.