"Ozongungu zovakuru novate vetu ze rira ombumbuhoze"
“Ozongungu zovakuru novaṱi vetu ze rira ombumbuhoze”, ena rembo rondekurona Onongo Rukee Tjingaeṱe nda tjanga ohunga nOtjiṱiro Otjindjandja, ndi ri tjimuna omaserekarerwa tjimuna ovimbaharere ongondoroka nomakuruhungi wOtjiṱiro Otjindjandja posi ya nge he ri omakuruhungi nungwari nge ri omahonge momuano wawo oyeni mokutja ya tjangwa kutja ngu me ye rese a ha urwa okuyeresa nungwari ma kare nombango nonyuṋe yokuyeresa okumana.
Hapo nao ozongungu zavo ozo wina nḓe hi nehuno azeririvi ombumbuhoze nominyo vyavo ngavi suvisiwe vi?
Kazonḓa ozongungu zovaku- ru novaṱi uriri nḓerira nominyo vyavo mbi ha suvisiwa, nungwari wina ozondekurona zavo azehe kaze ya suvisiwa. Otja tjinga aze uhara amaze kwanga kutja ombinḓu yovakuru vazo i ura kohoromende yEhi rOvandoitji nga mba. Ozondekurona okuza mOnamibia ngandu kOtjauana na South Afrika na kwarwe akuhe mouye pu pe nondambo yorutjindo rwovita ku nEhi rOvandoitji oruveze rwohuurire. Kutja ndino ndi ovo ve rimune otjozosewa nomakombezumo nga mba momahi mu ve ri nandarire kutja ya kutuka.
Ngunda ozondekurona mOnamibia aze rimuna ousewa nomakombezumo mehi ravo, tjingetjo ozondekurona ozongwao mOtjauana na South Afrika wina ve ri mu notjozosewa nomakombezumo potuvari. Tjinga wina nandarire imbo voyavo mba zirire kumwe ave ve hendeka nokuvehumba noondarire okuhina okuvevara nandarire kutja ovo wina ozondekurona okuura zOtjiṱiro Otjindjandja.
“Eṱe mOtjauana, otjongurameno yoBOSNOO… tu muna kutja katu na indu twa rorere okuvarwa kaparukaze i yEhi rOvandoitji, nu otjiihamise tjinenenene i yovevere retu oveni ovo aruhe mbe tja ve nozonḓero zetu,” ondekurona Stephen Kazeire Raurau, ma raisa nao. Eye omayuva womasuviro wa ri mOtjomuise pOmazemburukiro wEyuva rOtjiṱiro Otjindjandja.