ACC kuna pumbwa ewapukururo-Van der Merwe
SWAKOPMUND- mukuronagona pamberewa zoANTI –Corruption Commission munaveta Erna van der Merwe katente asi usesu woyimaliwa ntani varugani kuna kureta udigu mokutura yirugana yombunga ezi mouta wakora.
Van der Merwe kalimbwilire mapuro posiruwo sepongo lyountane kugava nombudi kupitira movanambudi kalikereko moSwakopmund moutano una puko. ‘’ Vakomisare, kumwqe novaporosi vaNamibia, kuna pumbwa yimaliwa yinagwanene novarugani vana gwanene yipo asi vakare novarugani vanadiva kukona kona ntani kugwana yirapota yimwe yoyipe. ‘’ Nsene ngwendi moomu vana tura mbunga ezi zoNmRa, sihonena awo nare vana kutu vantu wokusika ko 53 wokutarurura nombapira dawo komberewa zonene, ano dogoro ngesi ACC kuna kara novarugani 36 wokukona kona, vana kara asi awo kuna kuruganena sirongo nasinye, yina kara asi kapi vana gwanene, yimo ana kutanta. Mokugwedako, Van der Merwe mbunga zawo ngesi kuna kara tupu nava wokugava egano ndi erongo mokurwanesa ukorokotji ndi umbondo mosirongo nasinye.
‘’ Nsene kwakugazara asi mulyo goyihorokwa nayinye moyirugana yetu kwato sirongo satunda moumbondo kwahana kukara asi kuna kara novarugani vanagwanene yipo vagave mulyo gomberewa ezi. Mokukwama mwendi age Van der Merwe katente asi kuna karako yirapota yoyipe yina siki ko 82 ntani yihorokwa yimwe eyi yina pilire kuyimana, eyi yina kara asi nampo kompanguro, ndi kuna kundindira vayiture mosironga ndi metokoro, moErongo, mberewa zaACC, kuna kara asi mbererwa ezi simpe kwazitumbukira mukunda gwaKunene. Mberewa ezi kuna kara tupu novakonakoni vatatu ntani evango limwe muporongwa ntani kwaturako tupu muporosi gumwe, ogu gakara asi kuvatera moyihorokwa yimwe. Mukondi gomakona kono moErongo, Willem Olivier katente asi mberewa kuna kara nomaudigu gomanzi unene muna hamene kugwana nombangi, kukareta usili, kukwata mazwi gowo ono kupuragera ntani sinano nye sokuza oku yina horokere ntani oku yina kukakarera yipangura oyo. Olivier katente asi uwa kutulisapo malikwamo gokugava nombudi kovantu kuhamena umbondo ntani kutara asi ngapi omu natu wapukurura ntani kutara asi ngendeseso musinke naturuganesa nazivatera mukugusapo udigu wangesi.
‘’ Twahepa kukuta vantu moyirugana unene vadiva kukona kona sihorokwa, nsene tuvagwana owo hawe ngano yininke nayigendapo tupu nawa eyi nayitwaredera asi nkenye yimwe tayizi noyirugana moomu tuna yiharere twahana kumana siruwo. Nokuyima moomu tupu yawapera nosiruwo, yimo ana kutanta ngoso Olivier.