Napu kale uuthikepamwe pokati kiitopolwa momalanditho gonyama: Schlettwein
Minista guunamapya, omeya netalululo lyevi Calle Schlettwein okwa ti ope na ompumbwe okuninga omalunduluko moshikondo shonyama, meni osho wo kondje yomusinda omutiligane. Ta popi noshikundaneki shoNampa pethimbo taku ningwa etaambo miilonga lyelelo epe lyoMeat Board of Namibia mEtitatu, Schlettwein okwa ti Namibia ina pitika omusinda omutiligane gu ngambeke oompito dheliko moshilongo.
Ta dhenge omuthindo kutya omusinda omutiligane itagu keelele epangelo lyi mone omangeshefelo gokondje yoshilongo gonyama ya za haandiya lyomusinda omutiligane, ta ti onyama ya za kiitopolwa yokuushamba ngashiingeyi otayi landithwa kuChina naSouth Africa.
Schlettwein ta ti omusinda omutiligane otagu kondolola ashike etaandelo lyomikithi dhiinamwenyo,unenetuuomukithigwekondo nelaka ngoka tagu vulu okutaandela ee tagu kwata iimuna inaayi tuntilwa kuumbugantu womusinda ngoka. “Onyama ndjoka hatu li okuza kiitopolwa yokonooli kayi na omikithi nenge uuzigo, nando nando. Ohayi ende koshidhinditho sha kwata miiti. Eyitaalo kutya onyama ya za kiitopolwa yanooli oyi na ongushu yopevi kalyi shi lyoshili na kandi shi mpoka lya za. Sho tatu popi ngeyi, ohatu li onyama mOvenduka ya za kokatomeno koKatima Mulilo,” ta ti ngaaka.
Schlettwein okwa fatulula kutya oshipotha shoka shi li kompangu ngashiingeyi oshinima shomegumbo na inashi indika aanafaalama yokonooli ya vule okuninga iipindi tayi yi kondje yoshilongo. Moshipotha sha li sha tulwa mo kuJob Amupanda gwoAffirmative Repositioning momasiku 26 Mai 2021, Amupanda ota pula ompangu yi kuthe po omusinda omutiligane ngoka gwa li gwa tulwa po kepangelo lyuukoloni momumvo 1896, kutya kagu li pakotampango lyoshilongo.
Momumvo 2021 omo tuu moka, Schlettwein Okwa ti okukutha po ondhalate ndjoka yomusinda omutiligane otashi tula oshikondo shonyama moshiponga oshinene shoka ngashiingeyi shi na ongushu ya konda oobiliona N$7. Iilyo iipe yelelo lyoMeat Board of Namibia uule woomvula ndatu komeho oyo Lucia Hamuteya (omunashipundi), Paul Klein, Jessy Kamwi, Sartorius Von Bach, Rosalinda Katjivena, Julene Meyer, Annascy Mwanyangapo, Willen Kekwiyu, Patrick Liebernberg nChristopher Mberema. -Nampa