Va hala Nascam a katuke onghatu
ONGWEDIVA - Omuimbi weengalo dopamhepo Keneddy Haikali a shiivika nedina loushikingalo VK Haikali okwa holola eudonai laye molwa etandavelifo leengalo daye tali ningwa oshali –oshinima sho shi li kondje yoveta. Haikali okwa hokololela oshifokundaneki eshi nokupopya kutya yee okwa kala omushikingalo weengalo dopamhepo efimbo lile nokwa li lela hashi ende nawa monakudiwa.
Unene tuu ngeenge tashi ya pokulandifa oukaseta vaye.
Exumokomesho paife ola ninga oshiimbi lela shakula mokuninga ongeshefa yange yeengalo iha ye komesho.
Ovanhu vahapu paife ohava kala va fya ounye wokulanda oukaseta shaashi ohave litumine ashike eengalo daHaikali keengodi davo pamalungula ngeenge eengalo daye da pitimo. “Ohandi lihange ashike ndi na nande ovanhu vatatu ile vatano ovo va landa oukaseta vange.
Keneddy ota hokolola kutya eshi tashi mu ehameke unene osheshi kutya oto hange ashike ovanhu tava shiki eengalo doye va manguluka shoo shihe li paveta.
Okwa weda po yoo kutya konima yefiku iha dulu vali okumona oshimaliwa sha wana opo a dule a ye komesho nongeshefa yaye yoludi eli shaashi ovanhu itava lande. Haikali ota pula nefimaneko linene opoNascam a tameke okunghonopaleka eemhango daye unene tuu ngeenge tashi ya peengalo davo. “Ngeenge Nascam ota kwata efimbo ohatu ka tula eenghono momake etu vene ndele hatu pula komesho nokuamena eengalo detu,” Haikali ta weda po.
Sackeaus Lala oo e li naye omushikingalo weengalo dopamhepo moNamibia okwa popya kutya voo ohava longifa oimaliwa ihapu ndele ihava mono nande osha tashi dulu oku mu vatela meengalo daye shaashi otadi danwa ashike oshali. Ohashi pula nge oimaliwa ya fika peyovi ile i dulife po ndele natango ovanhu ohave litumine ashike eengalo dange oshali ponhele yokulanda opo naame ndi dule okuya komesho. Okwa weda po yoo kutya yee oha mono eengalo daye tadi danwa luhapu ko-NBC, Omulunga, nokoFresh FM ndele iha mono po nande ofilinga. “Pashiivo lange ngeno opo omahangano aa a pewe epitikilo lokudana eengalo edi ove na okukala va futa oshimaliwa kuNascam, yee ngeno NASCAM ta tukula novashikingalo ndele fyee ihatu mono ko sha,” Lala ta ti. Nokuli mopaife ihandi twala vali uukaseta vange kuNascam shaashi kashi idule, eengalo doye otadi shikwa ashike oshali.
Lala natango ota pula yoo oshiwana opo shi xulifepo okukala tashi dengele ovashikingalo pedu, nomukalo wokuvaka eengalo davo inadi futwa. “Vanamibia natu tamekeni okulanda oukaseta ponhele yokulongifa oshali shaashi paife fyee ovashikingalo ohatu nane noudjuu,” Lala ta weda po.