MICT onghee ta twala omauyelele moshiwana
Ovanambelewa mouministeli womauyelele nomakwatafano opaungoba moshitukulwa shaHangwena onghee veli pyakidila oku andjaneka noku twala ouyelele koshiwana.
Hilma Nakanduungile oo e li omunambelewa wouyelele kOhangwena, okwa lombwela Kundana ta ti ouministeli wavo okwa li wa talela po omukunda Ondobeyomunghudi moshikandjahoololo shaNgela Etivali omo va ulika ouvidio vena sha nekondjelomanguluko.
“Okwa li yoo twa ulika oudivo voshivilodimbuluko sheedula 34 demanguluko laNamibia sha li koKatima Mulilo koshituklwa shaZambezi oshivike shadja ko.
Oshiwana osha holoka momwaalu muhapu nokwali sha hafa,” Nakanduungile ta ti.
Okwa ti ova talela po oikandjohoololo ngaashi Oshikango, Engela, Omulunga, nEndola.
“Okwa li yoo twa yandja ouyelele kombinga yomayakulo haa yandjwa kouministeli wetu.
Nohatu twikile okutalela po oikandjohoololo ya yooloka moshitukulwa shaHangwena molwashi osha fimana ngeenge oshiwana tashi pewa ouyelele,” ta ti.
Nakanduungile okwa ti pefimbo va talela po oikandjohoololo imwepo ova didilika kutya oshiwana momikunda osha pumbwa ouyelele kombinga yomayakulo ouministeli womauyelele.
Ta ti oshinima eshi oshe va twa omukumo opo va yandjaneke ouyelele momidingonoko.
Nakanduungile okwa wedapoyookutyaouministeli wavo onghee ngaa tau twikile nokuyandja ehongo loshali lokompiuta kovanhu ve na ehalo lokulihonga okumpiuta nomwaalu munene wovanhu ve li shangifa eetundi edi.
“Eetundi dokompiuta ohandi pewa ovanhu aveshe veedula dayooloka, naau te li shangifa tete oye ta kwafwa tete, ” ta ti.
Okwa ti ombelewa yaye otai ka shivifila oshiwana kombinga yomalishangifo taa ka landulako molwashi paife omwaalu omuhapu wovanhu ve li shangifa.
Kansela woshikandjohoololo shaNgenga Mathew Shikongo okwa ti ouyelele wa pewa oshiwana owa fimana molwashi otau eta eudeko lawana koshiwana kombinga yomayakulo ta yandjwa kouministeli ou.