Yeli 10 ya si miiponga yomoondjila pethimbo lyopaasa
Omwaalu gwiiponga yomoondjila mbyoka ya lopotwa pethimbo lyehuliloshiwike ele lyapaasa, ogwa shuna pevi okuyeleka noomvula dha piti pethimbo lya faathana.
Omunambelewa omukuluntu koshikandoshokulongaoshigwana kombinga yiiponga yomoondjila moMVA fund, Absalom Kaume Itumba okwa ti, okuza momasiku 24 sigo opo tundi 13h00 mo31 Maalitsa nuumvo, aantu yeli 10 oya si miiponga yoohauto moshilongo ashihe.
“Momasiku ngoka natango omwa holoka iiponga yili 60, moka mwa ehamekelwa aantu yeli 113,” ta popi ngaaka.
Okwa yelitha kutya nonando oshiwike sho paasa osha tamekele momasiku 29 gaMalitsa, omaso niiponga yimwe oya holoka omanga omasiku gopaasa inaaga adha.
Ta ti, oya lopotelwa aantu yaali ya si moshitopolwa shOtjozondjupa, sho okabesa koQuantam kwali ya londa mu ko ka gu kopaate.
“Ohauto yoRanex noToyota yombaki odhi indenge mumwe, naantu yaali okwali ya hulitha, mopate onene yEenhana nOndombe, omanga natango ohauto yoRanex nombaki dhali ishiwe ndhiindhenge mumwe, omuntu gumwe ta si, koNdivundi,” ta popi ngaaka.
Ta ti, oshigwana itashi lopota iiponga mbala, opo aantu ya vule okumona omayakulo omanga ku yele.
“Otwa ndhindhilike iiponga tayi holoka omolwa omatayiyela, oohauto kandhina omatayiyela,” ta nyenyeta ngaaka.
Ta ti olundji ngele owaadha okabesa kena omateyela geli nawa, nena okatemba ka kena geli monkalo yili nawa, sho shoka hashi eta iiponga.
Itumba natango okwa kumagidha aahingi ya kale taya lombwele aafalelwa ya imangele momapaya oshowo ya londe nawa.
“Aalongithi yondjila naya kale haya hingi ku yele pethimbo lyomasiku gomafudhepo, opo yaa kale yuudha moondjila. Natango naya hulithe po okuhingilila owina, yo taya tula uuvidio komalungula, ngoka teke shi ninga ota tu ke mu landula oshoka inashi uthwa,” ta kumagidha ngaaka.