Namibia kuna kutura mosirugana nombapira do visa kudigwana poyasika mosirongo Sitambo, kwakuninkisa vadinguli vawize wovanzi.
Sirongo saNamibia vana gusa etokoro lyewa mokuninkisa asi vadinguli vawize mosirongo omu nye kavageve mbudi asi ngesi nombapira edi avatumbura asi Visa tavadigwana poopo ono kuyasika mosirongo unene komavango aga gokuhwililira gadivikwa. Ministeli zovawizimo ngesi kavatulire nye elikwamo eli paveta silika kasihorokerere pomberewa zawo zonene moVenduka sivike kasipwire. Ministera Albert Kawana kankondopekere sitambo sangesi omu vana kuwapukurura nokusesupika maudigu gava vana kugenda vawize moNamibia unene ava nye wokupitira pomavango ngwendi monomukunda //Kharas naOhangwena. ‘’ Elikwamo eli lyokutura asi muntu gakona kugwana Visa opo ana kuhwilire mosirongo kuna kumoneka asi napakawiza marunduruko unene moyiwizamo yetu yokutunda kovadinguli. Udivi wetu kuna kulikida asi eyi nayirerupika owo vana kuhwilira, nayininkisa Namibia sikare sirongo vana kuhwilira vadinguli noureru,’’ yimo ngoso ana kuyitanta. Monongendeseso nye edi donompe, vadinguli vana kuhwilira moNamibia kupitira momavango aga vatura paveta asi gokuhwililira owize mosirongo, ngesi vahepa nye kufuta kupitira momagwanekero go online, ndi kuruganesa nomahina ofute. Kawana kafatwilire momunene asi mulyo musinke guna karamu nsene muntu toruganesa nompito dangesi, kugusapo mukaro dona ntani kuninkisa nye varugani nove ono kufuta opire kusimba simba yimaliwa momalimba. Elikwamo lyangesi kuna litambesere asi navenye vahepa kugwanenamo mauwa, vadinguli, vapunguli, wokuwiza koyigongi nomapongo ntani ava nye vana kuyadingura vaholi vawo nava vana kuyapapara uhaku.
Mokugwedeka, kawana kayibubwire asi vanayirongo woyirongo yimwe, yina kara asi 58 moyipakerera mouzuni, ngesi nayikagwana nye nombapira dokuwisisa mosirongo opo onokuyasika. Mokuyididilika, yirongo yimwe kuna kara nye asi Namibia kapi gakarako novakarelipo vendi, nye tuna hara kuwapukurura vadinguli vagenda vana manguruka. Eyi kuna kuza nye tukatare asi ngapi natuyiwapayika yipo yikaretesepo mauwa ntani mouzuni, ntani Kawana kahundilire yirongo yimwe asi nayo yahepa kugusa sihonena sangesi vasigave kovaNamibia. Yipo asi turetesepo mauwa aga gana kara asi kapi tuna kutamangera koukanguki wovantu vetu, ose twahepa kuyirugana paudivi, neharo, mokuvatera vadinguli vetu, rambangako vaporosi nawo vahepa kugwana mbudi ezi. Mokugwedako, konombapira edi dedinguro, ministeli zomonda zosirongo, ekungo nepopero ngesi kuna kutara nye mavango ngwendi komazenga getu, ngwendi koWalvisBay, omu vadinguli vamwe ava wiza noyikepa, nye kuvaranga morwa vahepa kuzwida nombapira dokuhwilililisa mosirongo. Immigartion mukurona gwazo pamberewa Etienne Maritz kayinkondopekera asi awo tava kakuta vantu wokusika ko 380 ava nye navakakara komavango gokuhwililira, ntani kukagava nye nombapira dosirongo konomvharerwa ntaani varugani monomberewa, eturo moyirugana kuna kara nye asi kuna kukahaga paapa nazikapwa mvhura ezi kukwama eyereko simaliwa.
–isipunga@nepc.com.na