NAMBTS a patulula endiki lipe
Omupopiliko wehangano lokuyandja ohonde loNAMBTS Titus Shivute okwa ti ova patulula endiki lipe lokuyandjela ohonde koEros moWindhoek onghela.
Okwa ti elalakano lendiki eli lipe opo kukelelwe engudumano lovanhu ponhele imwe ngeenge vaka yandja ohonde.
Onghee okwa ti NAMBTS ota lalakanene okuyandjaneka omandiki okuyandjela ohonde opo oshiwana shi holoke momwaalu muhapu.
Shivute okwa ti endiki lipe ota li kala tashi longo Etitatu keshe okudja potundi 08h30-16h00.
Okwa ti ovanhu tava ka pumbwa olefa yokuya kendiki nava kwatwafane konomola yongodi 081 122 1265 opo va dule okutwalwa kendiki nokushunwa komaumbo avo.
Onghee okwa kumaida oshiwana opo shi holoke momwaalu muhapu okukayandja ohonde molwashi ohonde oya fimana kovanhu unene tuu ovanaudu.
Okwa ti NAMBTS ota twikile nokukala a kwashipaleka kutya ovanhu ve li momhumbwe yohonde moipangelo ova pewa ohonde opo eemwenyo davo di kale da xupifwa.
Okwa ti ohonde ei tai yandjwa koshiwana ohai kwafele ovanhu ve na omikifi da yooloka ngaashi okaangela, pefimbo oomeme tava pulumuna, omunhu ngeenge ta tandwa nosho tuu omikifi dikwao.
“Osha fimana ngeenge hatu xupifa eemwenyo dovanhu moipangelo tashi pitile mokuyandja ohonde molwashi ovanaudu vamwe ohava kala ve li monghalo idjuu tai ya pumbwa ohonde,” ta ti.
Okwa ti oshiwana nashi topolafane ouyelele kombinga yefimano lohonde opo ovanhu va kale ve na eudeko la wana nokukala ve na ohokwe yokuyandja ohonde.
Shivute okwa ti ehangano loNAMBTS ota li pandula oshiwana eshi shi na ohokwe yokukayandja ohonde komandiki a yooloka ayeshe moshilongo.
–fhamalwa@nepc.com.na