Omateyo gomagumbo ga indjipala
Opolisi oya ndhindhilike omateyo gomagumbo taga indjipala moshilongo ashihe. Okuza mehuulilo shiwike ele, okwa lopotwa omateyo gomagumbo ga thika po mulongo. Okwa lopota ehala lyomanwino tali ithanwa Sbongae mondoolopa Opuwo moshitopolwa shaMusati, Etitano lya teywa uusiku wOlyomakaya, eta mu kuthwa iinima yongushu yoN$8 670. Aafuthi anuwa oya teyagula wo eshina lyoongalo. Opolisi oya lopota aafuthi ya iteyele megumbo koKlein Windhoek, taku fekelwa ya pitile mekende, etaya kutha mo iinima yongushu yoN$14 200, Olyomakaya. Natango Olyomakaya ya zi ko aalumentu yaali anuwa oya mangwa po sho ya adhika niimaliwa tayi fekelwa ye yi yaka meshina lyokudhana. Oshiningwanima osha holoko momundhingoloko Outjo, lwopotundi 15h00. Otaku hokololwa kutya aalumentu mboka okwali ya thigwa komulandithi pehala mpoka omanga a ka logekidha omwiha puushinda. Aalumentu mboka anuwa oya teya ekumba lyeshina etaya kutha mo oshimaliwa shi thike N$5 260. Opolisi oya lopota eteyo lyegumbo, koBrakwater koWindhoek, mwa kuthwa iilongitho yokoonyala yongushu N$27 600. Natango okwa lopotwa egumbo limwe koMariental lya yakwa iinima yongushu yi vule N$38 000, uusiku wEtitano. Opolisi sho ya ningi omakonakono otayi fekele omufuthi a pitile mekende. Opolisi oya lopota iinima yongushu yi vule N$4 800 ya yakwa megumbo limwe koNkurenkuru, mehuulilo shiwikje. Inaku tseyika kutya ngoka a yaka okwali a longitha shike opo a e gulule omweelo. Natango okwa lopotwa omukiintu a ponokolwa megumbo koombundhi molukanda Uupindi mOshakati, eta kuthwa iinima yongushu N$45 000. Opolisi oya kumagindha oshigwana shi kale tashi lopota iiningwnima ku yele opo opolisi yi gandje omakwatho mbala. –vakaapanda@nepc.com.na