Simon Hashiyana: Omunandjungu nomutekuli muwa
OKATOPE - Tatekulu Simon Hashiyana, umwe wovanangeshefa votete mOngwediva okwa xulifa mefiku mepipi lomido 100.
Hashiyana, oo e li umwe womovanangeshefa votete va tota po eengeshefa mOngwediva okwa xulifa mefiku 01 Apiilili 2024 moshipangelo shaShakati
Okwa fiya po ounona 10, ovatekulu 43 nomukulukadi waye.
Otaku hokololwa Hashiyana a kala e na eefitola komikunda ngaashi Oikango, Ondjabaalala nokOshekasheka.
Pefimbo Kundana a talela po oshuumbo shaye onghela pOkatopepOngwediva,umwe womonakadona Verelia Hashiyana okwa hokolola ta ti xe okwa li omulumenhu ehe hole ondjala molwashi okwa li alushe a kwashipaleka kutya ovanhu aveshe ova lya meumbo.
“Tate okwa tekula ovanhu vahapu meumbo letu, ka li e na okatongo shaashi okwa li a yambidida ovanhu shi fike pamwe,” ta ti.
Okwa ti xe okwa li omulumenhu e hole ongeleka nokwa li alushe ha lombwele ovaneumbo vaye va ye kongeleka keshe Osoondaxa.
“Ka kwa li e hole ovanhu tava tukana meumbo laye. Ngeenge okwa udu omunhu a popya oshitya shakaka ote mu lombwele kutya ine shi ninga vali,” ta hokolola.
Valelia okwa ti ova kanifa omulumenhu omutekuli wo shili, omulumenhu ou kwa li alushe e hole oku ya keumbo a humbata oikulya,” ta ti.
Rigrirde Hilinganye, umwe womovamutekulu, nokwa kala ta longo meefitola daHashiyana okudja pefimbo loita fiyo Namibia a manguluka, okwa ti xekulu okwa yambidida ovakwaita voPLAN neengheno.
“Tatekulu okwa li ha yandje oikulya kovakwaita noshoyo omeva.
Ovakwaita okwa li ve hole okuhondama meumbo laye shaashi okwa li ohava pewa omakwafo,” ta ti.
Hilinganye okwa ti okwa longa efimbo lile e kwetele eengeshefa da xekulu komesho shaashi okwa li eli nekelwa.
“Onda didilika kutya okwa li a fimaneka ovakwaita neenghono, ka li e hole eembulu nande. Okwa li hati ovakwaita ova fimana shaashi otava kondjele Namibia a manguluke,” ta hokolola nokukwena.
Hilinganye okwa ti eefitola daxekulu dimwepo oda hanaunwa po kovakwaita vaSouth Africa pefimbo loita.
Okandenge kanakifya Hashiyana, Ndaitavela Hashiyana okwa hokolola ta ti omukulu waye okwa li omulumenhu e na elandulafano nokuhole oyandja oikulya koshiwana momukunda wavo.
Omalongekido efudiko laHashiyana oku li metifa noshiwana otashi ka shivifila efiku lofaafaa.