Veli 151 mOmundanungilo va pewa eedjapo domadalo
Ovanhu 151 mwa kwatelwa ounona vomoshikandjohoololo shaMundaungilo moshitukulwa shaHangwena ova pewa eedjapo domadalo.
Kakele kokuyandja eedjapo domadalo kovakwashiwana ovo va dja komikunda ngaashi Omhalapapa noshoyo Oshipala, ovanhu vamwe ova fanekwe yoo omumutwe vopashiwana.
Omayandjo oufemba okwa ningwa pefimbo ovanambelewa vouministeli woikwameni va talela po Oshitukulwahoololo Omundaungilo.
Ovanafikola noshiwana shOvakwanghala ovo unene kwa li va didilikwa va pewa eedjapo domadalo.
Omunambelewa ta longele koshikondo shokuyandja omaufemba mombelewa yoikwameni mEenhana, Ndapanda Nghihepa okwa ti ombelewa yavo oya talela po omikunda mbali keifano lakansela.
“Otwa didilika yoo oshiwana shihapu momikunda ka shina omaufemba shaashi ovanhu vamwe ova taalela eshongo loshimaliwa shokuya keembelewa doikwameni kEenhana,” ta ti.
Okwa ti ombelewa yavo otai twikile nokutwala omayakulo okuyandja omaufemba popepi noshiwana.
Nghihepa okwa ti moshivike tashi ya otava kaya koshikandjohoololo shaShikunde. Okwa ti oshiwana kOshikunde shihe na omaufemba na shi holoke momwaalu muhapu opo shi dule okupewa omaufemba
Kansela woshikandjohoololo shaMundaungilo Festus Ikanda okwa ti oshikandjohoololo shaye osho shimwe shi hadi oshiwana shovayelele sha taalela eshongo lokuhe na omaufemba.
Okwa ti ovayelele vamwe iha mono oshimaliwa shopondjela shepangelo molwashi vehe na omaufemba.
“Osha fimana ngeenge ombelewa yoikwameni tai eta omayakulo okuyandja omaufemba popepi shaashi kombelewa kEenhana okokule,” ta ti.
Ikanda okwa ti ombelewa yaye otai twikile nokuufana eembelwa doikondo ya yooloka okueta omayakulo popepi noshiwana.