Omukulupe a lumatwa nokudengelwa peendingosho
Omukulupe weedula 63 okwa tambulilwamoshipangeloshaNgela konima eshi a lumatwa mombuda nokudengwa komutwe.
Oshiningwanima osha ningwa Olomakaya efimbo loufiku keendingosho komukunda Omatunda moshitukulwa shaHangwena.
Otaku hokololwa kutya omukulupe ou okwa ponokelwa komukainhu nomulumenhu.
Omukulumhu koshikondo shokukonakona oimbuluma mOhangwena omupedu Commissioner Amakali Zachariah okwa hokolola ta ti omukulupe womulumenhu ou okwa li ta kendabala okuya pokati kolwoodi omo kwa li omukainhu umwepo te lidenge nomonakadona.
Otaku hokololwa kutya ovafekelwa vavali ova nukila omukulupe noku mu denga shaashi vati ta kendabala okuya olwoodi pokati kovanhu ovo kwa li tave lidenge. Ovafekelwa, oonakulidenga aveshe okwa li ve li pondingosho imwe tava nwine omalodu pamwe nomukulupe ou. Opolifi oya ti omukulupe ou oku li monghalo idjuu molwaashi okwa dengwa neenghono komutwe nokulumatwa a ninga oipute.
Opolifi oya hokolola tai ti ovafekelwa ina va kwatwa po nokomakono opolifi otaa twikile.
Oshiningwanima shikwao, omukainhu weedula 30 naye okwa tambulilwa moshipangelo konima eshi a dengwa nokumonifwa oshiponga nodibo komulumenhu wopomukunda wavo.
Oshiningwanima osha ningwa keendingosho Onghatanga momukunda Ondungu moshitukulwa shaMusati efimbo longula.
Opolifi oya hokolola tai ti nakuninga oshihakanwa okwa li tava tanguna nomufekelwa naashi osha ka eta olwoodi pokati kavo vavali. Otaku hokololwa kutya omukainhu ou okwa dengwa neengonyo moshipala noshoyo okulyatwa. Omufekelwa ina kwatwa po molwashi okwa faduka po. Opolifi oya kumaida oshiwana opo shi xulifepo okutanguna ile nokulidenga ngeenge shi li keendingosho.