Omaulikilo oipindi otaa eta oyuuyemo meedoolopa - Iipumbu
Ominista yoipindi Lucia Iipumbu oya ti omaulikilo oipindi okwa fimana shaashi otaa eta oyuuyemo meedoolopa tashi pitile mokueta po omayakulo opashiwana.
Iipumbu edi okwe di popya kouvalelo kwa li wa wokuongela oshimaliwa shomauliko oipindi yaNdangwa mexuliloshivike.
Minista okwa pula omalelo eedoolopa opo a twikile nokuninga omaulikilo oipindi.
Pefimbo louvalelo oshimaliwa sheeN$484 200 osha udanekwa tashi ka yandjwa okudilila moshiwana noshoyo koikondo ya yooloka.
Omaulikilo oipindi otaa ka kala ko okutameka omafiku 30 Apiilili fiyo 4 Mai, paife ngaha oshikando oshi-11 Ondangwa tai ningi omaulikilo oipindi.
Omudo keshe omalelo eedoolopa oha ningi omaulikilo oipindi nelalakano lokueta oyuuyemo modoolopa noshoyo okueta po eemhito doilonga.
Moinista okwa ti ouminiteli wavo otau twikile nokuxwaxwameka omalelo eedoolopo noshiwana mokuninga omaulikilo oipindi lwoikando ya yooloka shaashi otashi eta po eemhito doilonga.
Iipumbu okwa ti okwa hala okumona eengeshefa tadi xumu komesho.
“Oshiwana nashi longe nelitulemo okuhambula po eengeshefa davo diha teke po,” ta ti.
Okwa ti omaulikilo oipindi otaa xwaxwameke ovanyasha va mone omhito yokulandifa oilandifomwa yavo noshoyo okuyandja oilonga kovanyasha vakwao.
“Omaulikilo oipindi otaa nane ovalandifi va yooloka okudja meni no kondje yoshilongo,” ta ti.
Okwa kumaida oshiwana opo shi kale tashi yambidida omauliko
oipindi molwashi otashi tu ovalandifi omukumo va twikile nokulandifa.
Okwa popya ta ti ovanangeshefa otava shakeneke epangelo ondjilakati okueta po eemhito doilonnga noshoyo okulwifa ondjala noluhepo.
Moyola wodoolopa yaNdangwa Paavo Amwele okwa ti omaulikilo oipindi okwa dana onghandangala ya kula mokuhambula po odoolopa yavo.
“Otwa eta mo eputuko modoolopa yetu noshoyo okuyandjaneka omayakulo koshiwana. Oshimaliwa osho hatu mono momaulikilo oipindi ohashi longifwa okuhambula po odoolopa,” Amwele a weda po.