Eemiliona N$5 kopologalama younafaalama weexuxwa
Ouministeli wounamapya, omeva netulululo lomadu owa tula poshitaafula oshimaliwa shemilliona N$5 tadi ka longifwa okuyambidida ovanhu va hala okutota po eepoloyeka deexuxwa.
Edi oda popiwa kumupeduminista wounamapya Anna Shiweda pefimbo kwa li ta yandje ouyelele nghene oshimaliwa shomutengenekwafaneko osho va pewa neudo tashi ka longifwa.
Ouministeli wounamapya neudo owa pewa oshimaliwa momutengekwafanako wepangelo shi fike pobilliona N$1.93.
Omudo wa dja ko ouministeli okwa li wa pewa oshimaliwa shomutengenekwafaneko obilliona N$1.7.
Omudo wa dja ko ouministeli okwa li wa tula poshitafula oshimaliwa sheemilliona N$5.5 shokulongifa kopologalama younafaalama weexuxwa.
Naashi otashi ulike kutya oshimaliwa shopologalama younafaalama weexuxwa osho tashi ka longifwa momutengenekwafaneko womudo 2024\2025 osha shuna pedu noshimaliwa N$500 000.
Shiweda okwa popya ta ti opologalama ei otai ka yambidida ovanhu koitukulwa 14 moshilongo.
“Elalakano lopologalama ei okueta po eemhito doilonga kovanyasha noshoyo okulwifa ondjala noluhepo momikunda,” ta ti.
Okwa ti omudo wa dja ko ovanhu 1 110 ova mona ouwa okupitila mopologalama ei.
Willem Amutenya oku li yoo omunafaalama weexuxwa nokwa hokolola ta ti opologalama ei oya fimana kovanyasha shaashi otashi yandje eemhito kovanyasha va ete po oilonga.
Amutenya okwa ti okwa didilika ovanyasha vahapu va mana omalihongo avo koiputudilo yopombada va mona ouwa okupitila mopologalama ei ya totwa po kouministeli wounamapya.
Okwa ti osha fimana ngeenge epangelo tali twikile okuyambidida ovanyasha neepologalama doludi eli shaashi otashi kelele ondjala noluhepo.
“Opologalama younafaaalama weexuxwa otai yandje omhito kovanyasha va longe oikulya yavo vene noshoyo va tote po eengeshefa dokulandifa omai neexuxwa,” Amutenya ta ti.
Omunashipundi wovanyasha moshitukulwa shaShikoto MartinOlembe Antindi okwa ti itashi ulike efano liwa eshi ounimisteli wa shunifa pedu oshimaliwa shokuyambidida opologalama younafaalama weexuxwa.
“Opologalama ei oya pumbwa oshimaliwa shihapu opo ovanyasha vahapu va dule okumona omhito okutota po oikuku yokutekula eexuxwa,” ta ti.