Nyime kahendaukire kahomokerere mugara moZaambezi
KATIMA MULILO- Vatungimo momukunda gwaKatima Mulilo goponze zodoropa kavapindukire mosiruwo sosidona omu vanyime vavali kavahendaukire mevango eli vakara. Ava kavatundire mo Chobe National Park, vagendagure tupu mwaza mukunda, omu nyime gumwe ngesi vana mudipaga konyima tupu apa kakwete mutungimo gomomukunda. Ministeli zoukungi nsitwe varugani vazo kapi kavakere negano nkenye nye vahepa kuroya nyime ogu. Siruwo nye oso kavakere tavapapara nyime ogu, hawe nyime yipo kuhomokera mutungimo ogu, ogu nye katekere kuwoko ntani karemanene unene metungi. Age makura yiyo kavamudukisilire kosipangero saKatima Mulilo oku kakagwene uhaku.
Murugani akeverere yikorama, Morgan Sai-Sai nkera katente asi awo kuna kuyigazara asi vanyime ava vavali kavahenene, gomugara nogugomukadi moChobe National Park sivike kasipwire mokupapara mema morwa udigu nye woruteni una kara momukunda. ‘’ Ose kuna kuyigazara nawa nawa asi vanyime ava kavatundire moChobe National Park kupitira mo Salambala conservancy pepi naNgoma. Awo kava kere ntazimwe makura yiyo kavakere siruwogona moSlambala. Vavali kavatundirenye movakwsawo owo ntazimwe makura awo kavayukilire nye koBukalo dogoro moSinjabuka. Awo kuna kugendagura tupu kwahana mema, morwa mukaro nye omu vayitura yikasama eyi yiligaunuke novantu. Ngesi udigu asi vatengure oku kavatundire. Awo ngesi kuna kugendagura nye tupu moSikunga conservancy pepi tupu nomukuro gwaZambezi,’’ yimo ngoso ana kuyigava. Sai –Sai katente asi vanyime ava vavali kavavamwene mosondaha awo kuna kunwa mema kongurova pembo moSikunga. Morwa pembo opo kwakarapo nombwa, makura awo kavadirukire nye vaze koLisikili makura kutameka nye kuza momukunda gwaKatima Mulilo Rural. Apa nye kavakere pevango olyo vanyime ava kavadipagere nongombe mbali pomukunda Imukusi mosondaha ngurangura. ‘’ Ose kuna hara asi tuvasinge vatengure twahana kuvaremeka. Ose kuna hara asi tuvatengwide mo Chobe National Park twahana kuvaremeka.
Ose kuna kupapara nye ngesi owo avarondeke yipo vavarondeke monaruwa vavatengwide. Vatungimo vakare tupu nomukaro gomuwa,’’ yimo ana kuvahiundira, komeho nyime ogu vamudipage. Sai-Sai katente asi vanafarama ava vana zumbanesa yimuna yawo vahepa kukaturamo eropoto konompitisili dawo dopampo ndi koministeli zegungo nsitwe yipo vavape nsonso ezi zawapera kupa muntu ogu ana zumbanesa yiweka yendi.